La mostra e l event de inaudazion i à n valor enjontà ajache i é ence stac touc ite te la scomenzadiva “Olimpiade Culturale di Milano Cortina 2026”, l program multidisciplinèr, plural e slarià fora te duta la Tèlia per portèr dant i valores olimpics tras la cultura, l’arpejon e l sport, compagnan i jeghes olimpics e paralimpics da d’invern, che i sarà ence te noscia region, i prumes dai 6 ai 22 de firé, chi etres dai 6 ai 15 de mèrz del 2026.
Amò apede, chesta scomenzadives tolarà pèrt ence al projet Combinazioni Caratteri sportivi, pissà e rencurà dal Assessorat a la Cultura de la Provinzia Autonoma de Trent per meter adum sport e cultura de gra a la colaborazion de desvalives musees e realtèdes culturèles del teritorie.
L schi - dant che doventèr pruma disciplina de la Olimpiades da d’invern, la pratega sportiva di gregn idoi di egn ’90 e di campiogn dal di d’anché, apede che di sacotenc pascioné che vigni an va coi schi te la valèdes da mont, - l é na tecnologia nasciuda te la preistoria, n element culturèl che se à evolù ti secoi. Te tempes e te desvalives contesć sozièi, l schi se à adatà aldò de sia funzion: tecnica de ciacia, manufat rituèl leà a mic e lejendes, meso de trasport più durà per i popui del Nord Europa e de la Èlpes, strument utol per la esplorazion e per i viajes, ma ence atività per se desvampolèr e motor del turism di gregn numeres.
La diretora del Istitut Cultural Ladin e del Museo, Sabrina Rasom, la auza fora l valor del confront: “I dessegnes de Manuel Riz i é deldut adaté a embastir la reflescion su la strèda fata e sul davegnir de la sozietà alpina e de noscia val, ence en previjion di emportanc apuntaments che sarà te pec meisc. Per chest, se aon pissà de binèr entorn a n desch esperc e protagonisć del setor turistich da d’invern, per se confrontèr a na vida averta sun desvalives argoments”.
La mostra, col portèr dant i dessegnes originèi de Manuel Riz e i èrc e i reperc da zacan metui a la leta dal Museo ladin e da privac, la conta la storia sozièla del schi con stories, curiositèdes e reflescions en cont del valor simbolich de chest strument metù al zenter del raport veior anter l om e la mont.
L stil del ascort autor fascian – vif, pizochent e rich de detaes, resultat de pascion e egn de enrescida – l se enterza con na selezion prezisa de èrc etnografics, leé a la storia del schi e più en generèl del turism de Fascia, teritorie che da sacotenc de egn à poja sia economia sul turism e sul sport del schi a duc i livie.
