Dar zettl bart khostn 750 euro. “Ditza bill soin gemuant ke dar bart soin in 50% bölvrar baz di drai uantze zettln vor a djar vor Tiról, Südtiról odar Trentino gelekk pittnåndar – asó hatta khött dar vorsitzar von Euregio Kompatscher – Dar Euregio asó geat an åndra bòtta übar di grentzan un macht no an åndarn tritt zo giana hèrta nemprar in pürgar, zo kooperara un zo geba mearar vèrt in Euregio sèlbart gianante no vürsnar zuar an européan integratziong”.
“Ditza iz a bichtegez zil boda iz starch gehöart in Trentino o, übarhaup von djungen: soin gest guat zo lega pittnåndr di öffentleschen sistèm von traspòrte un håm gearbatet vor a baila afte aministratìf struktùrn hattaz zuargètt zo macha pazzan di tariffe vo aniaglana redjong pittar åndarn” asó hatta khött dar vorsitzar vodar autonome Provìntz vo Tria Maurizio Fugatti khödante o vorgèllzgott in Kompatscher un in Mattle gedenkhante in da gelaichege zait bia ma sait gelånk zo risòlvra mearare problème:
“Balma redet vo sachandarn konkrète, soin guat zo giana übar in tèkneschen spèrrn zoaget bia dar Euregio hatt lust zo stiana nåmp in pürgar von ünsarn lentar un gemen eppaz mearar boda åndre nèt håm” hattar no khött darzuar dar vorsitzar.
Dar hauplåntsmånn von Tiról Mattle izzese o khött sichar ke dar naüge djarege abonamént saibe nützlich vor berdase mövart vil un vil vert nütztz di öffentleschen traspòrte vo alln drai in lentar von euregio: Bar khön hoatar ke bar bölln a mobilitét boda mage khemmen augehaltet”.
’Z soinda no sachandarn boda mochan khemmen auzgemacht, azpe bo ma mage gian zo khoava dise zettln un asó bartma no mochan eppaz paitn vorma mage åhevan. Di vorsitzar in da press konferentz bodase iz gehaltet dòpo in trèff von spitz organe in Gardental håm khött ke dar Euregio un di vüarom boda drinn soin haltn kunt zo maga auzgem di zettln balda bart bèksln dar orario von traspòrte in kristmånat 2025.
Dar Euregio Ticket iz drinn in arbat progråmm vodar südtirólar vorsitzarung von Euregio 2023-2025
Dar untar di dianst.
Tiról
• Da gåntz nètz VVT (Verkehrsverbund Tirol)
• Di trène vor långe viazan ÖBB in Tiról: Railjet, Railjet Express, Intercity-Express, Intercity, EuroCity.
Südtiról
• Dar gåntz sistèm vodar nètz "altoadigemobilità"
• Redjonàl trène eksprèss vo Trenitalia
• khummane trène vor långe viazan azpe: Freccia, Italo, EC, Intercity, Railjet
Trentino
• dianst in di statt un auz vodar statt vo Trentino Trasporti S.p.A.
• aisanpånen:
Trento - Malè-Marilleva–Mezzana
aizanpån Valsugana: Trento–Primolano
von Prennar sin atz Borghetto
Kublpån Trento-Sardagna
• Redjonàl un redjonàl èkspress trene vo Trenitalia
• khummane trène vor långe viazan azpe in Südtiról: Freccia, Italo, EC, Intercity, Railjet
Dòpo azta soin khent augelekk di pünkt boma mage khoavan di zettln barta khemmen augelekk o an arbat khnopf boda bart mochan schètzan bia ’z soinse vürgestèllt di laüt dòpo a djar.
Foto un pildar von Euregio
Downolad pildar un intervista in vorsitzar Fugatti da
Übarsetzt von Schaltarle vor di zung von Toalkamou vodar Zimbar Hoachebene
