“S schutzn van sprochminderhaitn ist oa’n van elementn as gem bèrt en de inger Autonomi ont s lòng sechen en konkret s gilt ver de gamoa’schòftn. Derretn de sproch billt song derhòltn der kultural pahalter ont de identitet ober aa hèlven za mòchen virm ver za meing sa envire lem ont mòchen kennen en de nain generazionen. Sechen òndra paispiln gip de moglechkait za kennen de mittln ont de rèchtn praich, tschbinnen as de òrbet as s ist kemmen gatu’ ont vinnen naia aussichtn ver de zukunft van insern gamoa’schòftn”, unterstraicht der provinzal assessor en unterstitzn van kennen de Autonomi, Simone Marchiori.
Kennen de delegazion van Serbski institut / Sorbisches Institut bart gem de moglechkait za kennen pesser de sorbische minderhait as ist en Taitschlònt. S bart kemmen gem mear òcht en de projektn ont en de virm praucht ver za mòchen bider lem de sproch, ont nou de strategi ver za laichtern s sozial-birtschòft verpesser ont s bider lem en de pèrng platz ont en de platz aus va de stòtt. A moglechkait ver za leing zòmm ausòndra dinger ont vinnen naia elementn as enteressiarn en de gamoa’schòft van ladiner, van bersntoler ont van zimbern van Trentin.
Der zòmmtrèff ist envire trong van Dinstn ver de Sprochminderhaitn ont ausbendegen netzn va de Autonome Provinz va Trea’t zòmm pet en assessorat van unterstitzn van kennen de Autonomi. Der zòmmtrèff mòcht toal van klender van naiòrbetn ver en 80° jorzait van Zòmmpint De Gasperi - Gruber ont derstellt a moglechkait ver za vertiaven de òllgamoa’politik ver za unterstitzn ont gem gilt en de sprochgamoa’schòftn, aa no de regln ont de mittln as paschraip s provinzal gasetz.
S bart toalnemmen aa der regional assessor ver en schutzn ont bèrt gem en de sprochminderhaitn, Luca Guglielmi.
Bail der trèff barts hom an dinst as ibersetzt en de glaichezait balsch-taitsch.
S toalnemm ist vrai, men miast se u’mèlln durch e-mail asn adrèss serv.minlinguistiche-relesterne@provincia.tn.it, men schraip der nu’m ont der ibernu’m ont de innricht as men toalmòcht.
De nochrichtn, aa en sproch, as de sait van zòmmtrèff
Derzua der programm van vourmitto
Ibersetz gamòcht van Sprochtirl va de Tolgamoa'schòft Hoa Valzegu' ont Bersntol
