Di initziatìf steat drinn in da provintziàl stratedjì, pinn zil, in da mittl-lång zait, zo pezzra di kompetentzan in di fremmegen zungen von studjéntn un studjénten vo alln in schualn, gloabante ke vürvüarn da kulturàl, ekonomesche un sotziàl identitét von Trentino makmaz tüan machante krescharn di kompetentzan un soinante guat zo reda a livèll européo un internatzionàl un vor daz sèll khemmenda augehaltet dise formatìf esperientzan in auzlånt, grüntlich zo kreschra sèlbart un zo lirna sachandarn boda dena bartn khemmen guat innzotreta in di bèlt vodar arbat o.
VOR BEM
’Z mangda nemmen toal di studjént un studjénten boda:
- gian in ditza schualdjar 2025/2026 in da zboate klasse von obar schualn boda innhaltn viar djar odar in da draite klasse von åndarn obarschualn boda innhaltn vünf djar in schauln institütt von Beleschlånt;
- boda håm mindar baz 20 kompìrt;
- boda håm soin vonsitz in di Provìntz vo Tria;
- boda lai lem in di Provìntz vo Tria (dar studjént boda lebet da mocht gian in an schual institùtt von Trentino);
- boda, azpe ekonòmesche livèll, gehöarn inar famildja pittnan ICEF “Famildja” boda auzkhint von sèll boda khint gebunnt un von sèll boma hatt in djar 2024, geroatet åhevante von 15 von herbestmånat 2025, gelaich odar mindar baz 0,83.
BO
A schualdjar in an Lånt vodar Européan Uniong odar in UK.
INNHALT
Ma mage nemmen toal vor a gåntzez schauldjar (daz mindarste 240 tang) odar vor a halbez (daz mindarste 110 tang).
BIA INNZOGEBA DI VORSCH
Di vorsch zo haba in schütz bart mochan khemmen inngètt, lai durch di protzedùr online, vo di zene mòrgas von fintzta 27 bintmånat 2025 sin mittartage un halbez von vraita 09 hoachnach 2026 garade vodar websait: www.provincia.tn.it/fse+ .
'Z gèlt untargelekk servìrt zo zala bazta khint gezért zo herbega di studjént in auzlånt, anvétze zornìrn baz vor schual zo giana zo macha steat zuar in studjéntn un soinen famildje. Di schütz boda bartn khemmen zuargètt bèksln nå in belz auzlånt ma geat zo studjara un vor biavl ziait (a gåntzez schauldajr odar a halbez) un bettana ICEF “Famildja” ma hatt.
Dar auzschraib zo giana zo studjara in auzlånt in Lentar vodar Europèan Uniong odar in UK steat drinn in Progråmm FSE+ 2021-2027 vodar autonome provìntz vo Tria gezalt vor in 40% vodar Européan Uniong/sotziàl européan plus Font, un vor in 42% von belese Stato un vor daz sèll boda hintarsteat dar 18% vodar autonome Provìntz vo Tria.
In gåntzan soinda khent untargelekk 600.000,00 euro boda zuargem zo zala schiar sèchtunsèchtzekh schütz studjo.
Zo haba in informatziongen:
Struttura Multifunzionale Territoriale Ad Personam
Bege Pranzelores, 69 – 38121 Tria
Von menta an vraita 8.30 – 17.30
Grümma Nummar : 800 163 870 – fax 0461 390707
websait: www.provincia.tn.it/fse+
Übarsetzt von Schaltarle vor di zung von Toalkamou vodar Zimbar Hoachebene
