Genau, de earste òrbet ist de sèll za paun au a struktur ver za verkaven trinkzaig ont èsszaig, zòmm pet an informativpunkt, birt ont bèrt gem en gònze parkplòtz kan Vròttn, ver ungefèr an kost va an milion va euro.
"S keart se - hòt derklort der pirgermoaster Moar - va bichtega òrbetn ver de inser Gamoa’, ver de inser provinz, ont ver òlla de turistn as bail de rifboch villn de insern pèrgplatz. S kimmp verpessert an dinst as ber schoa’ hom, der parkplòtz, ber barn semm leing an kloa’n kiosk, pet òllgamoa’ keirecher ont techniker zimmerler ont an dinstn. Òlls bart kemmen garift pet informativplakatn ont platz as de lokal bèrkn barn meing prauchen, abia as schoa’ ist iaz bail der summer. De òrbet ist zuazolt van Pnrr ont hòt noat gahòt va longa derlabzaitn. Iaz gea’ envire de bèrkn van lònt, as barn gem lem en en projekt u’pfònk ver za verpessern der sias turismus van Bersntol”.
De òndern zboa òrbetn, as sai’ s aupaun van an stòll pet ungefèr zboa’sk vicher (ver 1,4 milionen va euro) ont an pahalter ver za mòchen an agritur (ver ungefèr 1,1 milionen va euro), barn kemmen gamòcht en Fikareim, ungefèr as 1700 metre va heachekait. De zboa strukturn barn kemmen ibergem, asou as kimmp bider lem gem en plòtz, vouraus praucht ver za boan.
"En doi plòtz - hòt derklort der vicepirgermoaster Toller - pin e kemmen benn as e kloa’ gaben pin pet de kia. Òll familia van plòtz en de visker jor ist do kemmen en de vria pet de sai’na kia. Hait laider de kia sai’ runt bea’ne ont sechen der doi plòtz lar ont inngabòcksn van bòlt hòt mer gamòcht zòmmdrucken s hèrz. Iaz pet de doin projektn hoff ber za mòchen bider lem der doi plòtz ver de jungen, ont asou bider guat sai’ za hearn de schèlln van kia”.
Ver en president va de Tolgamoa’schòft, Fontanari, de òrbetn hom “vour gahòt an untersuach van projekt ont abia as der u’nimmp se u’ pet de lòntschòft”. “De doin òrbetn - sai’ strategisch ober de miasn hom a rèchta òcht en de umbèlt as de miasn drinn gea’. Abia lòntplan kommission ont Zentral schòff ver de ibergeb va de Tolgamoa’schòft sai ber guat gaben za gem gahassega ompòrtn ont hait konn men schoa’ sechen sèll as hòt trong, pet en u’vòng van òrbetn. S doi ist moglech gaben gèltsgott en a zòmmòrbet zbischn de lokaldinstn, Tolgamoa’schòft ont Provinz, pet an guatn rif ver de gònze gamoa’schòft”.
En doi link ist moglech oarnemmen der service video.
Ibersetz gamòcht van Sprochtirl va de Tolgamoa'schòft Hoa Valzegu' ont Bersntol
