“L stravardament de la mendranzes linguistiches l é un pilèster fondamentèl per noscia Autonomia e l é la proa concreta de sie valor per la comunanzes. Stravardèr n lengaz vel dir tegnir su n patrimonie culturèl e identitèr, ma ence fèr acioche se posse seghitèr al viver e a ge l passèr a la generazions neves. Baratèr esperiènzes ne dèsc l met de cognoscer strumenc e bona pratiches, fèr na reflescion sul lurier fat enscin ades e troèr ca perspetives neves per l davegnir de noscia comunanzes”, sotrissea l assessor provinzièl per la promozion de la cognoscenza de l’Autonomia Simone Marchiori.
La prejenza de la delegazion del Serbski institut / Sorbisches Institut darà l met de aer n aprofondiment su l’esperienza de la mendranza sorba, che l é te la Germania. Se jirà tel sotil di projec e sistemes touc su per la rivitalisazions e la pianificazion linguistica, ma ence de la strategies per favorir l svilup sozio-economich e per ripopolèr i teritories da mont e periferics. Na ocajion per meter a confront situazions desvalives e troèr ca elemenc de enteres ence per la comunanza ladina, mochena e zimbra del Trentin.
L apuntament l vegn portà dant dal Servije mendranzes linguistiches e relazions esternes de la Provinzia autonoma de Trent, dessema col assessorat a la promozion de la cognoscenza de l’Autonomia. L convegn l fèsc pèrt de la scomenzadives metudes a jir per l 80° cedean de la Cordanza De Gasperi – Gruber e l é na ocajion per aprofondir la politiches publiches per l stravardament e la valorisazion de la comunanzes linguistiches, col tegnir cont ence di prinzipies e di strumenc pervedui da la normativa provinzièla.
A chesta dì tolarà pèrt ence l assessor regionèl per l stravardament e la promozion de la mendranzes liguistiches, Luca Guglielmi.
Vegnarà fat n servije de traduzion simultanea talian-todesch.
L event l é avert a duc. Se cogn se registrèr dantfora per e-mail a la direzion serv.minlinguistiche-relesterne@provincia.tn.it, scrivan inom e cognom e sencajo ent de partegnuda.
Più detaes, ence per lengaz de mendranza, su la piata del event .
Chiò enjontà l program tel detai de la scontrèda
Traduzion di Servijes Linguistics e Culturèi del Comun general de Fascia
