Venerdì, 12 Luglio 2024 - 14:11 Comunicato 1882

En domenia ai 14 de messèl l Istitut Cultural Ladin à desche ghest l cor bulgar de ousc de eles “Kitka” L conzert l sarà te Sala Grana.
La rassegna internazionèla de musega popolèra “Discanto” rua te Majon di Fascegn

[Ladino] Tel chèder de la seconda rassegna internazionèla de musega popolèra “Discanto” metuda a jir dal METS - Museo etnografico trentino San Michele (direzion artistica Renato Morelli) e dal Zenter Servijes Culturèi Santa Chiara de Trent, tel Istitut Cultural Ladin “Majon di Fascegn” vegn portà dant l conzert del cor Kitka, n grop feminin metù adum da catordesc ciantarines bulgares che stèsc a Vienna.
L conzert, che l sarà ló da la Sala Grana del Istitut Cultural Ladin “Majon di Fascegn” en domenia ai 14 de messèl 2024 da les 5 domesdì, l se ouc al gran publich di cores trentins, ma no demò, dajan coscita l met de descorir la tradizions milenèra di cores e noscia reijes musicales jà recognosciudes da l’Unesco e scrites ite te la lingia di Patrimonies imaterièi de la Umanità.
La locandina della rassegna corale Discanto

Metù a jir tel 2012 sche sezion del più gran e desferent Bulgarian Rhythms, na sociazion culturèla che se tol dant de presservèr e valorisèr la gran tradizions folcloristiches bulgares a Vienna jà dal 2004 encà, chest cor nasc desche grop de ciantarines amatorièles che vegn ca da desvalives contesć etnics e musicai e che spartesc la pascion per la straordenères dissonanzes, i ritmes no armonics, i ornaments engatié e la forza gaerta de la musega tradizionèla vocala de la femenes de l’Europa orientèla.

L’ensemble Kitka à tout pèrt a n muie de conzerc te desvaliva zitèdes europeènes, desche Praga, Copenhagen, Dispruch, Brno, ecc.; del 2023 la à vent l secondo pest al World Peace Festival de Vienna, ciantan tel Palaz de la Nazions Unides, te la Catedrala de Sèn Stefen e en ultima te la Sala de Or del Musikverein. L cor Kikta l é anchecondì  sot la direzion de la maestra Maria Zlatanov.

De autra informazions sun: https://www.istladin.net/it/e/111 

(pc)


Immagini