S Bersntol, ist an kraizbe ver de mear kulturn ont politik, an plòtz bou s pakennen se mear praich van balschlònt ont va taitschlònt. S ist asou an rèchtn òrbetplòtz ver za studiarn de problemen ont sèll as keart no de virm ver za draustudiarn de mearer tschbinnen.
S barn toalnemmen zbelf vourklòffer va Balschònt, Ostreich, Taitschlònt, Schbaiz ont Croazia as sai’ òlla onderst zbischn sei ver òndra praich ont asou de barn meing mitklòffen as a toal bichtega dinger: de integrazion ver ber as hòt za tea’ va de untersuach en konteks, der einfluss van plòtz no en de virm ver za ausschaung, de lokal rezeption va de etnografesn òrbetn ont sèll as plaip - de problemen as auskearn - as de doi òrbet va untersuach lòck en de zait. De konferenz, as se en vraita af de 5 van prochet um 9:30 en gamoa’sol va Palai autea’ bart, ist gamòcht kemmen zòmm pet de Società italiana per la museografia e i beni demoetnoantropologici (SIMBDEA) ont s Tiroler Volkskunstmuseum van Tiroler Landesmuseen. En de naikait mu men vrai toalnemmen (s baret pesser innschraim se en doi link ) ont ist gilte ver de u’lear van learer. S bart hom an dinst va dolmetscher af balsch ont taitsch.
Van Bersntol, bou as Giuseppe Šebesta lònk plim ist (1919-2005), ist u’pfònk der sèll ring as en trong hòt za trong envir a multidisciplinar òrbet as òrmt u’ cinema, letrattn, kunst, literatur ont pau va puppn as van lokaln gschichtn arauskemmen. Strenger dokumentarist va de bissnschòft ont va de kultur, Šebesta ist en de glaische zait an visionar vourscher, guat za bècksln de fasziniarung ver de gschichtn en an plunder ver za verstea’ de antropologese birklechkait. De austell ist offet òll to finz af de 4 van schanmikeal, va um 10:00 finz um 12:30 ont va um 14:00 finz um 17:30.
Innbaich: en somsta af de 6 van prochet um 17:30 kan sitz van Bersntoler Kulturinstitut en Palai.
Derzua: program va de konferenz
Ibersetz gamòcht van Sprochtirl va de Tolgamoa'schòft Hoa Valzegu' ont Bersntol
