Martedì, 17 Agosto 2021 - 15:01 Comunicato 2221

Traduzione in ladino
Euregio, pea via la sesta edizion del concors “Turism e Agricoltura – Il Turismo incontra l’Agricoltura”

Teritories e setores a confront su la bona prateghes. Enscinuazions enscin ai 17 de november del 2021

L’é orì i termins per tor pèrt a la sesta edizion del concors “Turism e Agricoltura - Il Turismo
incontra l’Agricoltura”, metù a jir tel chèder de l’Euregio Tirol-Sudtirol-Trentin da man de la doi Provinzies autonomes de Trent e Busan e del Bundesland Tirol. L concors à l zil de viventèr a na vida neva l’integrazion, la colaborazion e la cooperazion anter l lurier da bacan e mond turistich. Amò apede l raprejenta na ocajion per i desvalives raions de se binèr e dachelanvìa se confrontèr tel concret en cont di projec, spartir la bona prateghes e ence meter en doura la proponetes e la idees portèdes dant. Tegnù cont donca de la valuta per la valorisazion de doi ciampes de scì gran emportanza per nosc teritorie, estra che del fat che la sporc na ocajion de più de confront a livel euro-regionèl, chesta manifestazion la é sostegnuda dai assessores de la Provinzia autonoma de Trent a l’artejanat, comerz, promozion, sport e turism e a l’agricoltura, bosć, ciacia e pesćia. Sie bando l’é stat aproà da la Jonta provinzièla de Trent.

Al concors pel tor pèrt sentadins del Tirol, Sudtirol e Trentin e persones giuridiches (desche per ejempie firmes, comuns, sociazions, istituzions, scoles) con senta legala te chisc raions.

Oget del concors pel esser provedimenc, scomenzadives, manifestazions, projec, prodoc o servijes (jà metui en esser o amò te la fasa de svelup o de pianificazion) che revèrda i teritories de l’Euregio, ma ence idees e proponetes, realistiches e da poder realisèr, che deide a sostegnir e portèr inant la cooperazion anter turism e agricoltura. L’é pervedù pesć per n valor de 6.000 euro en dut.

Co tor pèrt

Per tor pèrt se cogn portèr dant n projet tras l formulèr de enscinuazion, che pel vegnir desćiarià online su la piata internet del concors (https://www.tla-euregio.info/default_ita.aspx). Apede la descrizion del projet, de no più che 3 piates A4, podarà vegnir enjontà ence de autra documentazion (articoi su foli, comunicac stampa o de auter tel cajo de projec jà metui en esser.

Termins

L termin per tor pèrt al concors l’é en mercol ai 17 de november del 2021. L formulèr de enscinuazion e la documentazion del projet à da vegnir mané tras e-mail, tel format pdf, a la direzion info@TLA-Euregio.info. I venjidores vegnarà cernui da na jurìa. La premiazion sarà via per l’aisciuda che vegn.

Se pel troèr duta la informazions sul sit www.tla-euregio.info; per domanes o informazions se pel se oujer a la sozietà Transkom sas tras mail a la direzion info@transkom.it o per telefon al numer +39 339 5308823.

Traduzion di Servijes Linguistics e Culturèi del Comun general de Fascia
(Traduzione a cura dei Servizi Linguistici e culturali del Comun general de Fascia)

(cdt)


Immagini