
Dar vorsitzar vodar autonome Provìntz vo Poatzan un vorsitzar von Euregio, Arno Kompatscher, dar vorsitzar vodar autonome Provìntz vo Tria, Maurizio Fugatti un dar låntshaupmånn von Tiról Anton Mattle schupfan di sutdjént zo nemma toal in formatìf prodjèkt, khödante ke azma bill machan vürgian da Européan Uniong mochtma süachan z’arbata hèrta mearar pittnåndar übar di grentzan. Kooperarn zbisnen di State, di Redjongen un di Provìntzan atz Bruxelles lekk au sachandarn boda gian garade zo interesara ’z lem vo alln in pürgar. “Azma bill håm guate pürgar boda bizzan bia un baz, izta mångl azza khennen bia ’z funtzionarta di politika un di vüarom vodar Européan Uniong; ’z iz eppaz boda pröft in kamöüschaftn o vorstìan un seng vo nåmpm bia ’z khemmenda gemacht di gesetz vodar EU. ’Z iz bichte darzuar vor da öffentlesche vüarom un vor di laüt boda vürvüarn di lentar, abelirnen un åstèlln laüt bodasen drinndarkhennen übar dar organizatziong un bia ’z arbateda da EU un dar Euregio sèlbart”, asó khönsa Kompatscher, Fugatti un Mattle.
Ma vorst zo kandidarsase übarhaup in sèlln studjént boda bölln leng nidar nåmp in sèll bosa lirnen in di universitét eppaz mearar pratiko un håm gearn drauzoreda pinn européan politike un pinn åndarn studjént von Euregio Tiról-Südtirol-Trentino. Dar progråmm hatt an groazan interese vor berda bill machanen a karìara in politika, odar studjart modèrnega stòrdja, übarsetzung odar macht kulturàl studje, odar lai ainfach hatt gearn aulegen internatzionàln nètz un khennen laüt vo andre lentar übar di konfìn.
Alle di informatziongen übar bia innzoschraibase venntmase aftz disan link (dar link iz atz iglés)
Übarsetzt von Schaltarle vor di zung von Toalkamou vodar Zimbar Hoachebene