De relatorn hom derklòrt en de sai’na paitrong abia as gaben ist s Tol en de sèll zait ont en Kriag, bos as men kònnt song as de sait va de etnografi en de doi gschicht, de sai’ etik- gadònkn ont de sai’ roas en ònder “Zustand”. Ober s hòt nèt valn kennt der literarische kontekst ont de influssn zan paispil van misticismus ont va de taitsch “Dorfgeschite”, bos as men vinnen kònn va de gruamòrbetn en de literatur ont òndra mearer technischa aspektn, abia zan paispil de problemen as men vinnt za ibersetzn de bèrkn ont en de grenz as men gem mias en de autobiografischn spekulazionen. A session hòt gahòndelt van mittl as men prauchen kònnt za gem pakònnt en de lait de eirter as inspiriart hom de doin literarischn autorn, abia zan paispil de Rilke Promenade va Arco.
De studiumta sai’ envir gòngen pet de vourviar van film gamòcht va de taitsch television WDR pet de regi van M. Haentjes as en Robert Musil en Trentin en 1994 ont pet a runde van an ettlena kilometer pet vourlesungen as en be “Musil en Bersntol” as hòt mearer punktn bo as pasn tèkstn van Musil ont as men vinnen kònnt aa en de web-saitn van Bersntoler Kulturinstitut, pet de audio gamòcht van tria’tner Schulainstitut Rosmini.
Der convegno ist kemmen organisiart van Bersntoler Kulturinstitut abia toal van programm van PNRR “De kròft va der sprochminderhait: s bider augea' van a taitsches dorf en sud van Alpn”, projekt M1C3I 2.1, intervento 4 – seminarn, iniziativn, mittoal as de sprochminderhait. S hom toalganommen lait va mearer saitn ont as runt aupast hom ont enteressiart gaben sai’.
Ibersetz van Bersntoler Kulturinstitut
