En jebia ai 18 de setember i joegn partezipanc i é stac touc dant tel lech da marevea de Arte Sella, olache i à scontrà raprejentanc del mond de la enrescida e del Servije di bosć. Gian Antonio Battistel, del “Centro di Ricerca e Innovazione della Fondazione Edmund Mach”, l à sotrissà l’emportanza di projec europeegn de enrescida aplichèda te chest setor. Valentino Gottardi (Servije Bosć PAT) l à despiegà la particolaritèdes del grop forestal provinzièl e la desvaliva ativitèdes che l met a jir sul teritorie per stravardèr ambient e i sentadins.
L secont dì, en vender ai 19 de setember, l é scomenzà co la vijita al CFP ENAIP de Tieser – setor del legn mobilia e taèr fora l legnam, coordenà da la profesora Giada Mearns. La scontrèda con ensegnanc, studenc e ex-studenc, encomai profescionisć del setor, l’à fat vegnir fora l’emportanza de la colaborazion de duc i sogec del teritorie per creèr e mantegnir na filiera de valor e sèna, che la va da la gestion dreta del bosch a la sacotantes oportunitèdes profescionèles leèdes al lurèr l legn. La vijita a la Sia de la Magnifica Comunità di Fiemme e la firma Enrico Ciresa S.r.l. les à avert na fenestra su dotrei de chesta oportunitèdes. I tousc e la touses i à entenù soraldut l gran gust che l imprenditor Fabio Ognibeni l à tel vidèr na realtà aziendèla particolèra, desche chela di tulins de ressonanza per i strumenc a archet e i pianoforc, e l voler se renovèr aldò de na esperienza binèda te egn e egn de lurier. Ence la curta scontrèda con Alessandro Arici de Radio Fiemme la é stata rejon de ispirazion, con n encorajament a pontèr via da si ensomesc per svilupèr projec e i mudèr, con pazienza e dedizion, te realtà.
En sabeda ai 20 de setember i tousc e la touses che à tout pèrt al projet i é jic a veder l magasin de VAIA, col vegnir a cognoscer coscita co dal tormen del 2018 l é nasciù na startup che la é doventèda na realtà aziendèla che la fèsc de l’economia zircolèra sie core business. I efec del tormen Vaia sul teritorie i é stac touc ca da nef da Paolo Sandri, president de la categoria de firmes da boschier de la “Associazione Artigiani Trentino”, che l à contà del besegn de endrezèr da nef sia firma e, più en generèl, l setor de la firmes da boschier per responer a la gran catità de legnam che fora de n bel nia se à bina da la piantes rebaltèdes. Sia testimonianza l à sotrissà l’emportanza de fèr rei con realtèdes davejin e dalonc per responer a situazions de emergenza e, tel medemo temp, tor su la oportunitèdes.
L’emportanza de sostegnir i joegn e i fèr arvejinèr a la oportunitèdes profescionèles te la arees da mont per arsegurèr l davegnir de chisc teritories la é stata sotrissèda dai aministradores del post che i à tout dant i tousc e la touses a Roncegno Terme, l vizeombolt Mirko Montibeller e l assessor Giuliana Gilli, e a Tieser, l ombolt Massimiliano Deflorian.
L Discover Mountain Jobs 2025- Foresta e Legno l é stat endrezà tel chèder del Projet Support EUSALP, co-finanzià dal Program Intereg Spazio Alpino.
Maor informazions sul Grop de Azione 3 de EUSALP sun chest link .
Traduzion di Servijes Linguistics e Culturèi del Comun general de Fascia
