An fintzta atz 18 von herbestmånat di djungen toalnemmar zoin khent ågenump in da schümma kornìs vo Arte Sella, bosa håm gekhennt di vortretar von forestàl Dianst. Dar Gian Antonio Battistel, von Nåsüach un Vornaügarung Zentrum vodar Stiftung Edmund Mach, hatt khött bia di européan prodjèkte nåzosüacha soin bichte. Dar Valentino Gottardi (Dianst vor di Beldar vodar Provìntz) hatt gezoaget in bichtege ruòl boda håm di provintziàl Forestél un allz daz sèll bosa tüan zo schütza di umbèlt un di laüt.
Dar tage darnå, vraita 19 von herbestmånat, hatt ågeheft gianante z’sega di schual CFP ENAIP vo Tesero – sektór holtz möbl un sang ’z holtz, gevüart vodar profesören Giada Mearns. Dar trèff pitt profesör, studjént un ex-studjént, boda haüt sa arbatn in disan sektór, hatt gemacht auzkhemmen bia bichte ’z izta di mittarbat zbisnen alln in sèlln bosen ågeat zo riva auzolega an sistèm starch un pittnan groazan vèrt, an sistèm boda geat vo bia zo halta da kunt in balt sin afte mearare oportunitét zo maga vennen an arbat in sektór von holtz. Gianante z’sega di Sage vodar Magnifica Comunità di Fiemme un da sèll Enrico Ciresa S.r.l. di studjént håm gemak seng sèlbart dise oportunitét. Übarhaup di djungen håm gemak seng pittna bettana pegaistarung ’z arbateta dar untarnemmar Fabio Ognibeni in soinar firma boda macht armònesche vlekhan vor kubl strumentn un klavirn, un di bölle bodar hatt zo macha hèrta èppaz naügez haltante kunt von sèll bodar hatt gelìrnt in sovl djar arbat. Dar khurtz trèff pinn Alessandro Arici vo Radio Fiemme hatt o sichar gètt guate informatziongen, dar hatt khött in djungen ke azma gloabet in sèll boma böllat tüan an tage odar in åndar gelånkmada zo machaz khemmen realtét.
An såntzta atz 20 von herbestmånat di toalnemmar soin gånt z’sega in magazì VAIA, un asó håmsa gemak darvérn bia von sèll schaüla birbl von djar 2018 saida auzkhent a startup boda pittar zait iz khent z’soina a djüsta firma boda hatt azpe khèrn vo soinar arbat da zirkolàr bichtschaft. Von sèll boda hatt getånt dar birbl Vaia in ünsarne lentar hatta o geredet dar Paolo Sandri, vorsitzar vodar Feroine Håntarbatar von Trentino boda hatt kontàrt ke dar hatt gemocht bidar vången zo håntn soi firma un bèksln vil sachandarn zo maga arbatn allz ’z holtz boda dar birbl hatt gehatt nidargeprocht. Daz sèll bodar hatt khött hatt gemecht no a botta bia bichte ’z iz lengse panåndar pitt realtét boda machan da gelaichege arbat saiz azza soin nåmp, saiz azza soin vort bait o.
Vo bia bichte ’z iz auhaltn di djungen un nemparnse zo macha zèrte arbatn afte pèrng un asó gem a zuarkhemmane disan lentar håmda geredet di aministratör, boda håm ågenump di djungen atz Roncegno Terme, dar vitze pürgermaistar Mirko Montibeller un di asesören Giuliana Gilli un atz Tesero, dar pürgermaistar Massimiliano Deflorian.
Dar Discover Mountain Jobs 2025 – Balt un Holtz iz khent augelek drinn in Prodjèkt Support EUSALP, geschützt von interredjonàl Progråmm Alpinar Raum.
Zo bizzasan mearar aftn Khnopf Aktziong 3 vo EUSALP geat aftz disan link .
Übarsetzt von Schaltarle vor di zung von Toalkamou vodar Zimbar Hoachebene
