En pfinsta af de 18 van leistagest, de jungen as toalnemmen sai’ u’ganommen kemmen pet en schea’ rom va de Arte Sella, bou as de troffen hom de dersteller va de bèlt va de untersuach ont van Forestaldinst. Gian Antonio Battistel, van Zentrum va Untersuach ont Naiekait va de Fondazione Edmund Mach, hòt unterstrichen de bichtekait van europeischn projektn va untersuach unter en doi rom. Valentino Gottardi (Forestaldinst Provinz va Trea’t) hòt derklort bos as ist s provinzal forestal dinst ont bos as s tuat avn lònt ver za schitzn de umbèlt ont de lait.
En zboate to, en vraita af de 19 van leistagest, s ist augatu’ kemmen pet en pasuach en CFP ENAIP va Tesero - sektor van mobelholz ont van hòcken s holz, koordiniart va de leareren Giada Mearns. Der trèff pet de learer, de studentn ont de ex-studentn, as iaz òrbetn en sektor, hòt araustrok de bichtekait va de zòmmòrbet zbischn òlla de spiler van lònt ver za paun au ont pahòlten an ring va bèrt ont tsunt, as geat van korrekt regiar van bòlt finz en de mearer òrbetmoglechkaitn u’gahenk en veròrbetn s holz. S pasuach en de Sog va de Magnifica Comunità di Fiemme ont van bèrk Enrico Ciresa S.r.l. hom an bòlket augatu’ as a toal van doin moglechkaitn. De jungen hom auklaup der lust van tscheftmònn Fabio Ognibeni za vorn a kloa’s bèrk, as armonischen tovln ver straichstrumentn ont klaviar mòchen, ont s sai’ belln vernaiern no jarder va òrbet. Der kurz trèff petn Alessandro Arici va Radio Fiemme aa, hòt inspiriart, pet en korasch gem pet de sai’na entra’men ver za paun ont bècksln projektn, pet gadult ont lust.
En sòmsta af de 20 van leistagest de toalnemmer hom der magazi’ va VAIA pasuacht, ont de hom pfuntn abia as van schlèchts bètter van 2018 augòngen ist an bèrk as van zirkolarbirtschòft der sai’ core business gamòcht hòt. Der effekt va Vaia avn lònt ist auganommen kemmen van Paolo Sandri, president va de kategori van bòltbèrkn va de Associazione Artigiani Trentino, as klòfft hòt va de noat za tea’ bider organisiarn s aigene bèrk ont der gònze sektor van bòltbèrkn ver za gem omport en gònze holz as zuakemmen ist. De sai’ kuntschòft hòt unterstrichen de bichtekait za mòchen netz pet de glaimen ont vèrrn platz ver za gem omport en de momentn va groasa noat ont, en de glaiche zait, za pòcken der moment.
De bichtekait za unterstitzn de jungen ont za verglaimern sa en de òrbetmoglechkaitn en de platz va pèrg ver za versichern en de doin leneder a zukunft, ist tsòk kemmen van lokal amministratorn aa, de sèlln as de jungen en Rontschai’ troffen hom, der vicepirgermoaster Mirko Montibeller ont der asesor Giuliana Gilli, ont de sèlln as sa en Tesero troffen hom, der pirgermoaster Massimiliano Deflorian.
Der Discover Mountain Jobs 2025 - Bòlt ont Holz, ist organisiart kemmen bail en Projekt Support EUSALP, zòmmzuazolt van Programma Interreg Spazio Alpino.
Mearer nochrichtn avn Òrbetgrupp 3 va EUSALP en doi link .
Ibersetz gamòcht van Sprochtirl va de Tolgamoa'schòft Hoa Valzegu' ont Bersntol
