Daz sèll boma hatt gemak seng vert, balda dar Giro iz gerift a Sega di Ala, hatt gemacht schual. ’Z soinda zuarkhent vil mearar turìstn pinn rat pintante hèrta mearar in Trentino pitt disan laüt un hatt gemacht khemmen di khear von Lessini zbisnen in beng mearar gesüacht vo alln in apasionaratn vo disan spòrt von Beleschlånt un vo auz o. Èkko ombrómm, haltante kunt von sèll boda håm gevorst di lentar o, di Provìntz hatt auzgemacht asó. Dar bege est iz boroatet z’stiana in di stòrdje von Giro un in hèrtz vo alln in redar.
“Bar håm auzgelüsant baztaz håm khött di laüt von lentar un håm geschètzt ke ’z berat gest eppaz guatz vor alle, un asó habar geschauget bia ma hettat gemak tüan un håmz getånt” hatta no khött dar Fugatti. ’Z soinz gest übarhaup di Pürgermaistarn vodar Plaif, vo Kalnètsch, vo Leve un vo Tenna boda håm gevorst zo halta vest lengar di arbatn un zo halta offe in provintziàl bege n. 133 sin di lestn von snitt, zoa azma mage rivan garade afte pèrng un vor di turìstn.
Di arbatn
Da soin zboa di arbatn boda soin vürgelekk in sektoriàl progråmm Briaf 2021-2023 vodar Provìntz vor bazta ågeat in provintziàl bege n. 133 von Laaz. Arbatn boda mochan sicharn in bege, von khnottn boda magatn abevalln un betarnen, ombrómm atz zèrte saitn izzar no engar baz 3 mètre un an halm.
Da earst arbat boda iz drå zo khemma gemacht, geat å in tòkko zbisnen in zboa tornént obar in galerìan.
Ma bart betarn in gåntz bege un daz earst vo alln di zboa tornént boda soin eng un håm bintsche sicht.
Dar gåntz prodjèkt bart khostn schiar 1.200.000 euro dar kontràtt iz vo 700.000 euro.
Di arbatn bartn innhaltn in allz 220 tang un bartn khemmen gètt bidrumm auz pan månat von bimmat.
Übarsetzt von Schaltarle vor di zung von Toalkamou vodar Zimbar Hoachebene
(Traduzione a cura dello Sportello linguistico della Magnifica Comunità degli Altipiani Cimbri)
