La ressorses pervedudes les é de 60 milions de euro, e les vegnarà durèdes per la realisazion de operes infrastruturèles e de corsia resservèda a 48 neves mesi “green” (30 eletrics e 18 a biometan) su la streca Fiem-Fascia e per mudèr fora i mesi. L obietif l é donca chel de miorèr l trasport publich sun strèda de neva concezion.
I intervenc revèrda en dut 12 toc de strèda enlongia la streca prinzipèla che passa fora la valèdes de la Veisc, per n svilup lineèr de zirca 12 chilometres, estra che intervenc de viabilità ti toc che passa fora i paijes. L sistem Brt l vegnarà adatà ai oraries e ai besegnes de la sajons turistiches (istà-invern) ruan a portèr anter 200 e 1.100 jent a l’ora te ogneuna de la doi direzions. Aldò de chel che à dit l president de Trentino Trasporti Diego Salvatore, co la neva mobilità vegnarà tout su 50 sciofères neves apede a personal aministratif.
Sacotanta l é la costions portèdes dant te la osservazions: l’integrazion co la ferata e la linies ordenères de trasport publich al servije per i lurieranc e i gh esć; enjignèr la corsies e i semafores coche carenea, ence acioche l Brt abie la prezendenza sui crousdevia; endrezèr miec la fermèdes; piac dai auti per smendrèr la doura del auto privat; autostazions e deposic de Penia, Pardac, Ciavaleis e Sèn Jan.
Descheche à recordà l president Fugatti, l Prum Document de projet l é stat enjignà co la partezipazion de la Aministrazions locales de la valèdes de Fiem e Fascia. Tor dant la osservazions à dat l met de binèr ensema informazions, consees e critiches de utol per poder arsegurèr coscita che chesta opera la sie bona de ge jir encontra a la caratesitiches de la mobilità locala.
Descèria chiò l service video > https://bit.ly/3XOR8iu
Traduzion di Servijes Linguistics e Culturèi del Comun general de Fascia
