’Z puach redet bia ma sait gelekk azpe demokratzia in Südtiról un in Trentino. “Di demokratzia iz nèt a maschì boda geat lai alumma. ’Z soinz di laüt bodase lem bodase machan funtzionàrn. Soi qualitét darkhenntmase nå bia sèlbart ma höartze konfrontaratese pinn åndarn – balda soin di eletziongen un auz, baispil balma nemp toal in sèll boda khint getånt”, asó hatta khött di Alber.
Di Alber un dar Pallaver håm analizart di eletoràln sistème un biavl laüt gian zo votara, in provintziàl Rat un di Djunta, di kamöündarn un in ruòl boda håm di baibar in politika. Darzuar håmsa geschribet vo referendum, saiz a livèll vo kamöündar, saiz a livèll vo provìntzan. Di zboa autör soinse o augehaltet afte demokratege vornaügarung a livèll vo kamöündar, provintzan un euroredjong, khödante ke da demokratege toalnemmung in Südtiról un in Trentino hatt vorlórt vil. “Vor daz sèll iz zait, vo haüt vort, zo tüana allz daz sèll boda iz mångl zo vornaügra in sistèm” hatta khött dar Pallaver.
Dar libar mage soin gelest vo alln von djungen o, vo da makma åhevan a politesche edukatziong un zo übarlega afte demokratzia un afte toalnemmung.
Disar trèff iz dar lest von vünf strategeschen eventte boda håm skandìrt ’z djar 2025 von Euregio, übarlegante aftz bichtege tème boda gian vodar zuarkhemmane von musee, afte djungen, afte vornaügarung, auhaltung un stòrege nåsüach” hatta khö di Elisa Bertò von Djeneràl Sekretariàtt von Euregio. ’Z djar boda khint 2026 bartnda bidar soin åndre initziatìvan.
In okasiong von erta von Euregio izta khent hergerichtet in di vorhalle von Moggioli Haus an auzlegom übar dar Autonomì. Di auzlegom bart stian offe si an erta atz 9 von kristmånat in di orarie boda offe soin di emtar, in bege Grazioli 25 ka Tria.
Foto un pildar von Euregio
Download un pildar un interviste da
Übarsetzt von Schaltarle vor di zung von Toalkamou vodar Zimbar Hoachebene
