Traduzione in cimbro
Arge Alp un Euregio vairn pittnåndar di 50 djar vodar Alpinar Pintom
Atz Landeck hattma gevairt pinn vorsitzar Fugatti un Kompatscher pittnåndar pinn låntshauptmånn von Tirol Platter
Da håm gevairt pittnåndar atz 25 von prachant in Tirol, di toalnemmar vo Arge Alp un von Euregio Tirol-Südtirol -Trentino, zo vaira soinsase gevuntet atz Landeck: da Alpinar Pintom Arge Alp kompìrt, defatte, 50 djar. Auz in tages di zen toalnemmar vo ARGE ALP håm geopfart an raichan progråmm vor groaze un khlummane, pitt güatzla z’èzza, musìk un kultùr. Dar vairta iz khent offegetånt pinn istitutzionàl gruaz von vorsitzar von Euregio Maurizio Fugatti un von låntshaupmånn von Südtirol Arno Kompatscher un von sèll von Tirol, Günther Platter.
“Dar Vairta von Euregio haür lpintetze panåndar pinn 50 djar vo Arge Alp un gedenkhtaz bia soin guat z’stiana panåndar zbisnen lentar pitt deferentegen khennzaichan khint z’soina eppaz boda hatt an groazan vèrt vor di pürgar un di pürgaren åhevante von djüngarstn. Di vil kulturàl prodjèkte boda di lentar boda soin toal vo Arge Alp håm geopfart håmaz gemacht tokàrn pittar hånt allz ditza. Dar bege bobar bölln machan pitt Euregio un Arge Alp iz pròpio disar, leng panåndar alle di enerdjìe un di idee boda khemmen vürgelekk vo alln in lentar un machanse khemmen a schatz vor alle, a schatz boda pintetaz no mearar un boda zuargitt zo maga schaung bait in di djar boda khemmen åhevante vodar starchan traditziong z’arbata pittnåndar”. Asó hatta khött dar Fugatti.
’Z soinda o gest di konsildjìarn Marc Mächler von kantòu San Gallo un Christian Rathgeb von kantòu Grigioni un dar untarsekretardjo Alan Christian Rizzi vodar Lombardia. In trèff soinda khent vürgelekk di sachandar z’èzza von prodjèkt Arge Alp "Patrimonio culinario" un soinda khent auzgètt di 50 zettln vor Youth Alpine Interrail (YOALIN) augehaltet von Tirol.
In tage boda iz khent geredet vo bia ma mövartze in Euregio, atz 25 von prachant, berda zuarizkhent in festival – un hatt gehatt in abonamént - hatt gemak nützan alle di öffentleschen meze in alle drai di lentar von Euregio.
“Pitt disan fèst vairbar an bichtegen djartage vo Arge Alp drinn in da tirolar Vorsitzarom. Dar zil vo disarn alpinar pintom, augelekk vor 50 djar, geböllt vo Eduard Wallnöfer, iz gest dar sèll zo sterchra di kooperatziong von lentar von Alpm sin vo balma hatt ågeheft. Ombrómm di sbern sachandarn boda soin vo alle gelaich – baispil dar übargång odar di letzan bèttadarn – asó azpe di guatn sachandarn – didjìtalizatziong un schützan in klima – haltnse nèt au afte natzionàln konfìn. Vor daz sèll iz no mearar bichte stian gepuntet un lengda idee atz baz zo tüana. Haüt schaugbar stoltz atna kamòuschaft lente un vil sachandarn soinda khent getånt alle pittnåndar zo vüara di lentar von Alpm zuar a pezzarna zukunft, zuar a pezzarz lem vor alle”, hatta khött dar låntshaupmånn Platter.
Dar Arno Kompatscher hatt khött darzuar: “Vairn haüt di 50 djar vo Arge Alp in vairta von Euregio bill soin gemuant vil sachandarn vor in Südtirol: dar Zboate Statùtt vodar Autonomì boda hatt zuargètt in Südtirol zo maga arbatn pittnåndar übar di konfìn iz in vigór sidar 50 djar. In gelaichege djar di Lentar von Alpm soinse gelekk panåndar zo risòlvra ångst un problème gelaich vor alle. Geabar vürsnen pinn gelaichege zil vürzotraga hèrta sterchar bazta hatt mångl da européan Region, aftz ditza saibar drå z’arbata est mearar baz nia.”
Übarsetzt von Schaltarle vor di zung von Toalkamou vodar Zimbar Hoachebene
(Traduzione a cura dello Sportello linguistico della Magnifica Comunità degli Altipiani Cimbri)
https://youtu.be/X5I8uOIRw1A
(cdt)
Immagini
