Va Rovereto ka Alpbach turch Poazn
Der earste trèff va de Akademi van Euregio bart se hòltn ka Rovereto va de 23 finz as de 25 van moi. Pet de mittòrbet va de Fondazione Trentina Alcide De Gasperi, bart men studiarn as de gschicht van vergreasern van lònt galep van sprochen gruppn van Euregio ont van sai’ zòmmlem.
Der zboate trèff bart se hòltn en Sudtirol va de 4 as de 6 van heibeger: ka Poazn, de jungen barn òrbetn pet en suachinstitut van sudtirol Eurac Research ver za studiarn de klima plan van drai lander van Euregio ont de bècksln van bètter en de alpineregion. S barn kemmen studiart aa de situazion van minderhaitn ont s enviregea’ va de autonomie en Sudtirol.
S riven toal bart se hòltn va de 16 finz as de 18 van agest zòmm pet de Euregio Days en Europeische Forum va Alpbach 2025 en tiroler “Villaggio dei pensatori”. Men bart se pakimmern za klòffen iber de riven va de Europische Union ver za kemmen pesser, van schutzen van klima (Bussola per la competitività dell’UE - Green Deal) ont abia as bècksl de alpn lander iber de doin temen.
Innschraim se
Ver za schraim se inn en de Akademi van Euregio 2025 men hòt bail finz as de 27 van oberel 2025 as de sait van Euregio en adress zo www.euregio.info/academy . De toalkostn ver en gònze seminar, òlls zòmm pet en essn ont schloven aa ist va 90 euro. Ver za nemmen toal miast men kennen taitsch ont balsch en livell B1 oder heaher ont an kurzn priaf pet en bavai as men bellet toalnemmen.
Ibersetz gamòcht van Sprochtirl va de Tolgamoa'schòft Hoa Valzegu' ont Bersntol
