Traduzione in cimbro
’Z iztase gemacht verte un iz gånt garècht di editziong 2024-25 vo "dar Euregio bokhennt di schualn”
Da soin schiar 1.200 di trentinar studjént inngevånk, åhevante vodar untarschual sin afta obarschual
[Cimbro] ’Z soinda khent vürgelekk ettlane sachandarn, übarlegom, tagung, didaktìk spildar übar di tème zo arbata pittnåndar übar di grentzan, übar dar stòrdja, übar di zungen un mearare åndre argoméntn boda ågian garade saiz dar istitutziong, saiz in lentar: dar prodjèkt “dar Euregio bokhennt di schualn 2024-2025” izzese gespèrrt un iz gånt garècht, ’z håmda genump toal 27 schualn von Trentino un schiar 1.200 studjént.
Di arbatn – di mearastn gemacht in dupplzung – übar di stòrdja von lentar un di khennzaichan vodar istitutziong Euregio Tiról-Südtiról-Trentino soin khent vürgevüart in di schualn vo alln in livèlln vodar untarschual un au sin in da obarschual, von tèkneschen institütt afte licei un in di schualn profesionàln, vodar ladinar schual afta sèll Montessori bodase vennen in da ünsar Provìntz un in di haupstatt. Mearare trèff soinse gehaltet in Moggioli Haus, dar trentinar setz von européan Khnopf vor da lånt kooperatziong von Euregio, åndre trèff, anvétze, soin khent gevorst vo åndre emtar o, azpe di Universitét vor di eltarn un pittnåndar pitt mearare istitutziongen, zbisnen disan di Stiftung Museo Storico von Trentino.
Åndre tème tratàrt: geografia, stòrdja, Autonomì, zungen un bia ’z funtzionarta un iz organizart dar Euregio, prodjèkte afte bèlt von djungen, vodar schual un vo bazta ågeat in pürgar.
Dar argomént “Euregio” in dise djardar iz khent vor ettlane schualn a didaktik ativitét “standard” drinn in pürger edukatziong, sovl ke vil schualn håm gevorst in di djar zo maga gian hèrta vür pinn prodjèkt un haür håmda genump toal vor da earst bòtta 12 naüge schual.
