Augelekk drinn in sèll boda khint getånt zo schütza un zo untarstütza di zungmindarhaitn
’Z geata vürsnen dar dianst zo zoaga ORF 1 un ORF Sport in gåntz Trentino
Traduzione in cimbro
[Cimbro] ’Z geata vürsenen dar dianst zo zoaga di trasmisiongen von kanél ORF 1 un ORF Sport in gåntz trentino, a prodjèkt boda iz starch gepuntet in zungmindarhaitn, übarhaup in taütschan kamòuschaftn möknar un zimbarn, ma boda ågeat alln. Nå in sèll boda iz khent auzgemacht vodar provintziàl Djunta, defatte, di diridjénten von Dianst vor di zungmindarhaitn un auzantn sachandarn hatt getånt allz daz sèll boda iz gest mångl nidarzolega di konventziong pitt EI Towers, dar uantzege arbatar boda haltet da gåntz nètz von kanél in ünsarne lentar. Di nümmar von kanél stian hèrta di gelaichegen zuargètt von ministér vor di firme un von Made in Italy pinn soin dekrèt von 9 von prachant 2025: ’z soinz dar kanàl 75 vor ORF 1 un dar kanàl 76 vor ORF SPORT.
Dise kanél gem zuar z’sega gåntz garècht da öffentlesche österraichege televisiong, disa iz a gruntliche initziatìf zo sichra ’z rècht zo maga håm a televisìf informatziong vor di taütschan zungmindahaitn. Darzuar lazzan seng di kanél ORF sterchart un gitt vèrt in prodjèkt Euregio Tiról-Südtiról-Trentino asó azpeda auzmacht a naüga radjonàl delibera o.
Di bölle vodar redjonàl Djunta zo vornaügra in dianst zo zoaga di kanél ORF 1 un ORF Sport helft o zo khenna da taütsch zung un allz bazta ågeat dar österraichegen realtét, un in da gelaichege zait, macht vorstìan pezzar in groaz vèrt boda håm di zungmindarhaitn. Disa vorlegom, darzuar un sèll boda machan di trentinar lånt televisiongen, boda zoang nützliche sachandarn vor berda lebet in Trentino, augehaltet dise o von Dianst vor di zungmindarhaitn un auzantn sachandarn vodar Provìntz, bill khemmen z’soina a prukk zbisnen in belese, ekonomische kultural raum un in sèll taütsch-österraichege pinn zil zo macha krescharn ünsarne lentar.
Übarsetzt von Schaltarle vor di zung von Toalkamou vodar Zimbar Hoachebene
(cdt)
Immagini
