Lunedì, 23 Gennaio 2023 - 11:15 Comunicato 162

Traduzione in cimbro
Vorseng ’z bèttar von Euregio, TINIA vürvgevüart vodar autonome Provìntz vo Tria

Ångenump in skèm vor an akòrd bia zo macha di websait meteo.report

Ågenump in skèm vor an akòrd boda azumacht bia vürzovüara in prodjèkt “TINIA – vorseng ’z bèttar vor in Euregio” dar provedimént iz khent ågenump vodar provintziàl Djunta vürgelekk von vorsitzar Maurizio Fugatti, boda iz o vorsitzar von Européan Khnopf GECT von Euregio Tiról-Südtiról-Trentino.
Dar prodjèkt TINIA, augelekk ’z djar 2019 von autnomen Provintzan voTria un Poatzan pittnåndar pinn österraichesche zentràl Institùt vorz bèttar un geodinamica, bill gelången zo sichra aftna uantzega websait - meteo.report - an dianst zo vorsega ’z bèttar übar di konfìn un pittnåndar pinn drai lentar von Euregio.
“’Z soinda khent detzidart di arbatn zo macha un bia innzotoala ’z gèlt boda khint zuargètt dar Provintz un bia innzonemma di toalnemmar von Euregio in prodjèkt.
Da autonome Provìntz vo Tria nimpar å zo koordinara di arbatn un bart soin dar Dianst boda Vorhüatet Riskie boda bart ånemmen bazta iz zo tüana nå in sèll boda auzmacht dar akòrd untarschribet” asó hatta khött dar vorsitzar Fugatti.
“Bichte darzuar, barta soin di arbat vürgevüart pittnåndar pinn prodjèkt ALBINIA, dar boletì von lavìn von Euregio: di mittarbat von zboa khnöpf boda nåstian in zboa prodjèkte bart vüargian in di djar boda khemmen, zuargebante asó zo nütza pezzar ’z gèlt un pezzrante hèrta mearar in dianst sèlbart”, hatta no khött dar vorsitzar.
Il simposio su “TINIA “, il bollettino meteorologico per l’Euregio

’Z gèlt zuargètt vor di djar 2019-2022, iz khent inngeschribet in progråmm INTERREG V-A Italia-Austria 2014-2020. Est, zo maga gian vürsnen dar prodjèkt TINIA iz khennt inngelekk in arbat progråmm von Euregio vor di djar boda khemmen, un pittnar delibera von GECT boda iz khent gemacht in vorgånnate herbestmånat, izta khent zuargètt dar Provìntz vo Tria vürzovüara in prodjèkt, vor allz bazta ågeat dar vüarom, in teknischen un bizzschaftege arbatn vodar websait meteo.report. Untarschraibante in akòrd di Provìntz khint z’soina ’z Åmt boda bart mochan vüvüarn in prodjèkt TINIA vor di vünf djar 2023-2027 un bazta bart khemmen gezért bart khemmen augehaltet pinn gèlt boda bart khemmen zuargètt von Euregio, in gåntzan 100 tausankh euro atz djar.    

Übarsetzt von Schaltarle vor di zung von Toalkamou vodar Zimbar Hoachebene

(cdt)


Immagini