Col provediment ge vegn dat l’autorisazion, per l azes a la porzions de teren troèdes fora, al comissarie, ai tecnics de l’Agenzia provinzièla operes publiches e di Servijes Operes de la Strèda e de la Ferates, Geologich, Gestion Strèdes. La determina do la vegnarà integrèda coi inomes di profescionisć e de la sozietèdes esternes a l’aministrazion provinzièla che les vegnarà enciarièdes de meter a jir i relieves strumentèi, i sondajes, l’analisa del risech e duta l’ativitèdes de projet.
Varianta anter Ciampedel e Cianacei, l percors
Con referiment al percors, la soluzion possibola l é chela stabilida adum da l’autoritèdes istituzionèles e dai tecnics de la Provinzia co l’aministrazions de comun, en referiment solardut al tunel, da la man a sud de Ciampedel e Cianacei, che dajessa l met de tor fora i paijes.
La varianta troèda fora defat la ponta via dal nef rondel che l sarà al scomez de Ciampedel, a sud, enlongiaju l’hotel Flora Alpina, la passa via Veisc con n nef pènt e la rua ite sobito te la crepa con n tunel con apede n passaje sot tera de servije e la ciuta fora beleche a trei chilometres più a est da la man a norde de Cianacei, olache ades l é la toronaa che mena ta Dèlba/sun Podoi e Sela. L percors l tegn cont de la picola mudazions fates tel confront coi teritories per miorèr l passaje sora la Veisc.
En dut la neva strèda la sarà longia 3,2 chilometeres, con presciapech 2,8 de chisc te n tunèl tel crep.
Traduzion di Servijes Linguistics e Culturèi del Comun general de Fascia
