Traduzione in ladino
Varianta de Ciampedel e Cianacei, l comissarie l à autorisà l scomenz de la garejèda de projetazion
L é stat tout su l provediment che despon l contrat per l avis che vegnarà metù fora la setemènes che vegn. L finanziament complessif agiornà per i lurieres l é de 141,2 milions
[Ladino] Con na neva determina l comissarie straordenèr competent per i lurieres, Mario Monaco, ence sorastant generèl de Apop, l à autorisà l scomenz de la garejèda per dèr su la projetazion de la varianta de la strèda de Ciampedel e Cianacei (Opera n. S-1021). Tel detai, l provediment con chel che vegn manà a Apac la documentazion per la publicazion del avis che vegnarà metù fora la setemènes che vegn, l é en cont de “Servije de enjegneria e architetura del Projet de fatibilità tecnich-economich (PFTE), del projet esecutif (PE) e del coordenament de la segureza endèna la fasa de projetazion” per la realisazion de la unità funzionèla 1 de la varianta.
Con n auter provediment l é stat dat su ence la encèria per fèr la rilevazion topografica che serf per l svilup de la projetazion.
Col sotrissèr l’emportanza del avis de garejèda che vegnarà publicà sora n pech, l president de la Provinzia autonoma de Trent l met dant coche l é do a jir inant l percors per fèr chesta opera, de gra al lurier del comissarie. La projetazion, l sotrissea endò l president, la raprejentea n prum vèrech emportant per meter a jir dalbon na infrastrutura, na conferma che chesta opera vegnarà fata. La ressorses, l à dit amò apede, les é states metudes a la leta ence co la integrazion del Document de programazion di intervenc, fata da pech, che l’à arsegurà etres 52,3 milions de euro. Col portèr a 141,2 milions l finanziament complessif per na infrastrutura che miorarà la mobilità e la calità de la vita te la Val de Sora.
Via per la setemènes passèdes te na determina da dant l comissarie l aea autorisà l azes ai terens per fèr zertamenc e rilevazions de besegn e de utol per l svilup de la projetazion de l’opera.
Traduzion di Servijes Linguistics e Culturèi del Comun general de Fascia
(cdt)
Immagini
