L invern passà l Boletin, che l pea via endo con vender ai 28 de november, l à vedù en dut 5,7 milions de vijualisazions

Tel Trentin pea via danef la comunicazion del boletin de la levines

L Boletin de la Levines de l'Euregio, che l tol ite i teritories del Südtirol, Trentin e Tirol, l rua a sia otava sajon da d’invern. Ogne di vegn dat fora comunicazions su la previjions en cont de la situazion de la levines per la 24 ores per ogne teritorie. L boletin l vegn scrit ju dessema dai servijes per la levines di trei teritories del Euregio, e l é a la leta per set lengac, anter chisc l todesch, l talian e l ingleis.
Tel Trentin l é ruà la pruma nevetes da tant. La fiochèdes de chisc dis passé, che les è ruèdes enfin te la valèdes, no les à portà n muie de neif, enceben che te vèlch lech se è rué a mesurèr ence passa mez metro. I venc e l gonfet sa mont i à portà entorn la neif a na maniera malvaliva, con zones de erojion e monc de neif pericolousc e malsegures ti lesc sot l vent. Se cognessa fèr a na moda da no jir ti lesc con neif ventèda che i esperc i è bogn de recognoscer, soraldut olache l é terens con carateristiches morfologiches particolères.
Te chest temp, per chi che fèsc l schi da mont, l é de gran emportanza ence tegnir cont di strufes che se pel se branchèr per i sasc che pel sutèr fora per sora (sharks) e, per chi che va a fèr percorsc con demò pecia neif e col fon giacià, l è l pericol de sluzièr.
La publicazion del boletin la se à desmostrà ti meisc da d’invern na fontèna de informazion emportanta e segura tant per i pascioné de sport da d’invern che per i aspec leé a la protezion zivila. Via per la sajon passèda, l boletin l à registrà en dut 5,7 milions de vijualisazions, e l à arjont coscita n record nef.