“Azpe Muséo Lusérn – hatta khött di Nicolussi Giacomaz – saibar kontént zo vortreta da kulturàl realtét von zungmindarhaitn un von khlumman lentar von Trentino. Disa esperiéntz gittaz zuar zo machanaz khennen vo mearare laüt, un zo khenna biar sèlbart åndre laüt, zo übarlega afte groazan sotziàl, teknologesche un kunstleresche naüge boda ågian in musee, darzuar vor üs iz gåntz bichte haltn kunt un gem vèrt ünsar zung. ’Z iz an onór vor mi mang tüan ditza pittnåndar pinn dokt. Marzatico.
In earst toal hattma geredet von Antonio Lampis, dirèktor von sèktor kultùr vodar autonome Provìntz vo Poatzan un djeneràl dirèktor von Musee von Ministèr vor di kulturàl sachandarn un turismo. In zboate toal bartada soin dar Michele Lanzingher, boda sa iz gest dirèktor von MUSE un vorsitzar vo ICOM Italia sidar ’z djar 2022. Dena bartnda soin di Micol Forti (da naüge dirèktören von MART), dar Francesco Frizzera (dirèktor von Mitag), dar Massimo Bernardi (dirèktor von MUSE) un vil åndre protagonìstn vodar kultùr.
Dar Marzatico hatt gedenkht: “Bia dar Muséo, augelekk an earstn lai azpe innhaltar vo mirabilia un alte sachandarn haüt iz drå zo bèksla hèrta bahémmegar. In dise lestn djar, defatte, ICOM – l’International Council of Museums – hatt vornaügart ’z bort museo sèlbart, gebanten, darzuar in traditzionàln kompite nåzosüacha, hizohalta, zo geba vèrt un zo edukara, naüge auzseng gepuntet dar zait bobar lem, süachan innzonemma alle, gem vèrt dar diversitét un dar tragbarhait”.
Di trasmisiong bill kontarn bia ’z bèkslnda di musee in di zait un baz aniagladar trentinar muséo bill vürtvüarn, redante hoatar, asó azta alle mang vorstìan, machante khennen pezzar di musee in laüt boda asó mang übarleng aftn groaz vèrt bosa håm.
Übarsetzt von Schaltarle vor di zung von Toalkamou vodar Zimbar Hoachebene
