Traduzione in cimbro
Studjåntzentrum afte autonomìan, nominàrt di toalnemmar von Komitàtt von espèrte
Pittnan provedimént vorgelekk von vorsitzar Fugatti khinta augelekk dar Zentrum
[Cimbro] Ma hatt ågeheft auzolega in "Studjåntzentrum afte autonomìan” boda iz gest khent vorgelekk in trèff bodase iz gest gehaltet atz Borghetto in okasiong von 50° gedenkhdjar von zboate Statùtt vo Autonomì un bidar gekheart vorzolega atz 5 von herbestmånat, in tage boma vairt di Autonomì: pittnan provedimént ågenump an vraita atz 13 von kristmånat, vorgelekk von vorsitzar Fugatti, defatte, da provintziàl Djunta hatt nominàrt di toalnemmar, studjös un espèrte, boda bartn soin drinn in Komitàtt boda bart mochan auzmachan bele initziativan zo macha un bia vürzovüarase zo studjara di Autonomì.
“Dar Zentrum bart mochan soin a punkt bodase bokhennen un boda drauren alle di sèlln boda studjàrn odar nåsüachan übar di autonomìan von redjonaln Emtar un von autonomen Provintzan. Di Provìntz lekk untar vor disan prodjèkt di profesionalitét von Komitàtt von espèrte, drinn in Komitàtt soinda istitutzionàl vortretar un akademische, guat z’schauga übar an euroredjonal horizont”, ditza hatta khött dar Fugatti.
Stianante nå in kompetentzan zuargètt soin Åmt übar bazta ågeat dar autonomì, dar asesór Simone Marchiori, bart håm in bichtege ruòl drinn in Komitàtt zo schupfa vür di arbatn un bart soin darzuar di pintom zbisnen in Komitàtt sèlbart un da provintziàl Djunta.
“Dar sèll vo haüt iz dar earst bichtege tritt bodaz vüart auzolega in Studjånt Zentrum: dar ünsar sistèm zo redjrase sèlbart iz gest, un iz no haüt, grüntlich vürzovüara ünsarne lentar un vor daz sèll iz djüst azta von Trentino khemda ågeheft zo übarlega bia zo geba mearar vèrt in an ordinamént boda lekk vorånavür vor earst di Autonomì. Disa initziatìf, defatte, bart mang soin a baispil vor alle di åndarn redjongen o”, asó hatta khött dar Marchiori.
Dar zentrum, bartze mochan vürstèlln azpe a pintom zbisenen in istitutziongen un di akademischen realtét boda sa haüt arbatn ume dar Autonomì, un bartz mochan tüan atz mearare frönt: åhevante nåzosüacha übar di sistème sèlbartzoredjrase un bia di lokal, natzionàl un européan politike sbern aftn ünsar sistèm, dena gianante no vürsnen zo macha khennen di kultùr vodar Autonomì un vürzovüara initziatìvan, tagung, workshop, un no aulegante bizzschaftege debatte un nationàl un internatzionàln mittarbatn, legante hèrta a dispositziong soine kompetentzan vor di istitutziongen un vor alle in sèlln bosen ågeat.
Dar provedimént boda iz khent ågenump lekk vür ber ’z barta khemmen z’soina toal von Komitàtt, vo disan, vor di Provìntz barta soin drinn di djeneràl diridjénten von Dipartimént vor di istitutzionàl sachandarn, antikoruptziong un durchsichtighait Valeria Placidi, boda bart soin di pintom zbisnen in Komitàtt un di åndarn provintziàln strukturn.
Darzuar in asesór Simone Marchiori di åndarn toanemmar soinz dise: dar djeneràl dirèktor von Museo Storico von Trentino Giuseppe Ferrandi, boda bart soin dar koordinator von Komitàtt; dar djeneràl sekretardjo vodar Stiftung Bruno Kessler Andrea Simoni; di profesör vodar trianar Universitét Luigi Blanco un Fulvio Cortese; dar nåsüachar vodar Universitét vo Milån Stefano Bruno Galli; di profesören vodar universitét vo Napoli L’Orientale Floriana Galluccio, di profesören vodar universitét vo Innsbruck Esther Happacher, di vorantbörtlich von nåsüachkhnopf von Bund Institut vo Eurac Research Elisabeth Alber.
Di toalnemmar håm alle khött ke da nemmen å; ma mocht khön ke vor disa arbat barta nicht khemmen auzgezalt, ma lai darkhennt daz sèll boda mage khemmen gezert von toalnemmar.
Übarsetzt von Schaltarle vor di zung von Toalkamou vodar Zimbar Hoachebene
(cdt)
Immagini
