Traduzione in cimbro
Schütz zo zügla ’z vich afte pèrng un zo schütza di biodiversitét, di vorsch mochan khemmen inngètt vor atz 30 von prachant
An Font vo 3,2 mildjü euro. Dar asesór Failoni: “A hilf pittnan sotziàl vèrt un boda darzuar gitt o vèrt dar låntschaft”
[Cimbro] ’Z izta zait sin atz 30 von prachant innzogeba in vorsch zo haba in schütz boma vennt drinn in auzschraib auzgètt vodar Provìntz zo schütza un auzohalta berda haltet ’z vich zo pèrge. ’Z soinda khent untargelekk in gåntzan 3,2 mildjü euro auzohalta prodjèkte boda håm ’z zil zo pezzra in auzglaich zbisnen arbat un låntschaft un darzuar haltn da kunt di biodiversitét, saiz da sèll von vichar saiz von èlbar un von gegres.
“Pitt disan prodjekt – khütta dar provintziàl asesór vor di beldar Roberto Failoni – böllbar auhaltn in konkrèt berda lebet un arbatet aftz ünsarne pèrng, darkhennante in groaz vèrt boda dise laüt håm zo halta di umbèlt”.
Dar auzschraib iz drinn in Natzionàl Stratègesche Plån vodar PAC 2023-2027 un iz augehaltet o vodar Européan Uniong durch in agrar european Font vor di ruralitét, von Stato un vodar autonome Provìntz vo Tria.
’Z khemmenda finatziàrt agrar arbatn zo halta di umbèlt boda nèt gem gèlt, übarhaup arbatn boda haltn in gåntz di natùr, un boda süachan zo macha stian pezzar pittnåndar da agrar arbat pinn gebillt.
’Z khemmenda augehaltet arbatn zo pezzra bia ma nützt ’z bazzar von pèrng, azpe hülm, vaske, zistèrne, trögar vorz vich un impiånte zo höatra ’z bazzar o.
Darzuar bölltma schupfan zo nütza di sèlln etzan boda soin khent gelatt gian öade un asó pezzarn di umbèlt vodar nètz Natura 2000.
Dar auzschraib gitt zuar gèlt vor berda bill machan traditzionàl zöü pitt holtz un bill richtn di sèlln pitt stuaplattn magare legante darzuar staudn un asó baz, un no eletresche sistèm zo schütza ’z vich von groazan vlaischvrèzzar un vor strukturn zo schütza di paigehaüsla (Bienenhaus).
Dar schütz dekht in 70% von sèll boda khint gezert sin daz mearaste 100tausankh euro vor aniaglaz, ’z khinta darkhennt, anvétze dar 80% vor arbatn vürgelekk von forestàln Feroine.
’Z mangda inngem in vorsch di padrü odar berda nåsteat in pèrge saiz öffentlesche saiz privètt, darzuar o di pauarn, di paingzüglar un di feroine un di konsòrtzie vo disan.
Di vorsch mochan khemmen inngètt lai online vor atz 30 von prachant von 2025 aftn portàl von provintziàl agrar sistèm SRTrento aftz disan indiritzo https://srt.infotn.it/ odar afte websait https://a4g.provincia.tn.it/
Alle di informatziongen punkt vor punkt mang khemmen gelest afte istitutzionàl websait von Forestàl Dianst.
Übarsetzt von Schaltarle vor di zung von Toalkamou vodar Zimbar Hoachebene
(us)
Immagini
