En vourder binter de La’ nochrichtn, as vonk bider u’ van vraita as de 28 van òlderhaileng, hòt registriart en gònzn 5,7 milionen as hom s tschechen

S vònk bider u’ en Trentin s dinst va de La’nochrichtn

[Mòcheno] De La’nochrichtn van Euregio, as lukt Sudtirol, Trentin ont Tirol, vonk u der òchte binter. Òll to kemmen gem de informazionen as en voursechen van bètter ont van la’ ver de 24stunnen ver an iatn lònt. Gamòcht zòmm pet de dinstn van la’ van drai lander van Euregio, de La’nochrichtn ist tschrim en sim sprochen, zbischn de doin taitsch, balsch ont englesch.
En Trentin s hòt u’pfònk za schnaim. S schnaim van lestn to ist kemmen nider en de telder aa, ober nèt asou vil ont nèt pferlech, aa benn s en a toal saitn s ist gòngen ouber s hòlb metro. Der stòrch bint en hoa hòt verba’nt der schnea’ en vill saitn pet platz pferlech ont nèt gabiss as de plaim stiller bou as nèt bint hòt. De hucker va schnea’ verba’nt miasetn kemmen kennt van lait as auskennet sai’ van gea’ as de pèrng en binter pet en schnea’ ont semm men miaset nèt gea’ iberhaup bou as de platz sai’ gamòcht sistn pferlech. En de doi zait van jor, ver ber as geat as de alpnski ist bichte za pakimmern se va de platz bou as hòt spitzega knottn (sharks) ont ver de escursionistn as gea’ en beng pet bea’ne schnea ont pet ais s ist pferlech slipfen.
S druck va de la’nochrichtn s ist kemmen tschechen abia a guats ding bichte en de binter mu’netn ver de escursionistn ont ver de lait as pfòllt en der sport van alpnski zan mearestn ver de sicherket. En vourder jor de la’nochricht hòt registriart en gònzn 5,7 milionen as hom s tschechen, s ist gaben asou an nai record.