Pet en doi mosnemm de Provinz versterchert der ring va bideraugea’ en de kultur, en zòmmlem ont en de birtschòft van lònt, asou za gem bèrt en de ausònder sproch ont en de kultur va de gamoa’schòft. Der bando keart um en de schlisslnòrbetn van projekt, pet en rif za richten aus ont gem bèrt en de hittn ont en de gschichtlegen haiser as hait nèt praucht kemmen, asou za paun an integriartn ont bèrtlegen turismus as guat ist za versterchern de schea’nekait van lònt ont van gònze Bersntol. Ber as de òrbet kriang bart, bart reklam mòchen ont regiarn de nain hittn, ont bart anschlisslpunkt sai’ ver en lokal turistesn nètz ont bart hèlven za stelln vour s lònt avn mòrk en an oa’negen ont kompetitiven vurm. Der bart derzua a baita òrbet va turistesn marketing tea’, as guat ist za pintn zòmm de birtshaiseròrbet pet sèll as men vinnt en plòtz bou as men geat. En doi kontest bart s moglech sai’ aupaun integriartn dinstn ont lempackler, asou za gem bèrt en de ausònderkaitn van lònt ont va de lokal gamoa’schòft. De pahalter as kemmen vernaiert gèltsgott en de òllgamoa’paitrong barn kemmen galeik en de bait birtshaiser sistem ver mindestn zeichen jor, asou za meings nutzn en de zait ont meing gem a stabilitet en de turistikopfer.
Der bando bart en a kurza zait galeik kemmen as de istituzional internetsait va de Autonome Provinz va Tea’t ont de vrong barn meing kemmen vourstellt van mitta as de 25 van merz finz zamitto va de 30 van oberel 2026. S barn kemmen tschèrlt de vrong durch an òllgamoa’prozedur, de barn kemmen tschatzt van a kommission as vour hòt technische ont birtschòft kritern.
Ibersetz gamòcht van Sprochtirl va de Tolgamoa'schòft Hoa Valzegu' ont Bersntol
