A naiekait as keart en de politik ver za schutzn de sprochminderhaitl
S geat envire der dinst ver za bidersechen de sender ORF 1 ont ORF Sport asn gònze trentinische lònt
Traduzione in mòcheno
[Mòcheno] S geat envire der dinst ver za bidersechen de sender ORF 1 ont ORF Sport en Trentin, an ausònder projekt u’gahenk en schutzn de sprochminderhaitn, iberhaup ver de taitschn gamoa’schòftn zimber ont bersntoler, ober as enteressiarn de òndern lait aa. No an schick va de Provinzaljunta, de viarer van Dinst ver de sprochminderhaitn ont ausbendegen nètzn hòt notschauk en òlla de sòchen as noat gaben sai’ za tea’ ver za mòchen de konvenzion pet El towers, der oa’zege as ist ver en inser lònt. Der numer van sender plaip der glaiche as s ist kemmen ibergem en Minister van bèrkn ont van Made in Italy petn dekret van 9 van prochet as s ist verpai: der sender 75 ver ORF 1 ont der sender 76 ver ORF SPORT.
S baitergem van sender gip de moglechkait za prauchen guat ont flusseg de òllgamoa’ osterraiche sendung, abia gruntnnaiekait ver za versichern en de gamoa’schòft va taitscha sprochmiderhait de audiovisuellen nochrichtn en taitsch. S kennen sechen de sender ORF, nou, geat za versterchern der zòmmprojeket van Euregio Tirol-Südtirol-Trentin, abia tschrim asn a leiste regionalausrot.
S belln vernaiern va de Provinzaljunta der dinst ver za sechen de sender ORF 1 ont ORF Sport verraichern s unterstitzn van kennen de taitschn sprochen, va de osterraichesche pet de sai’na aigenhaitn, ont asou sensibilisiarn der kultural pahalter van sprochminderhaitn. De doi vourtschbinn, as derzua en de innhòltn van lokaln televisionnètzn geat, as iber en temen as guat prauchen kemmen ver en Trentin klòffen, ont as unterstitzt kemmen van Dinst ver de Sprochminderhaint ont ausbendegen nètzn, bill zòmmhengen de balsch kultur ont birtschòft pet de taisch-osterraichesche, ver a lòntverpesser.
Ibersetz gamòcht van Sprochtirl va de Tolgamoa'schòft Hoa Valzegu' ont Bersntol
(cdt)
Immagini
