“Giramuseo” e “Caccia alla traccia” se à out a families e bec: l prum per na vijita più lijiera e che soscedea curiosità tel descorir l percors che l popul ladin de Fascia à fat tel temp enscin aldidanché, l secont per na vijita a la mostra “1914-1918 La Gran Vera – La Grande Guerra: Galizia, Dolomiti” te sia senta a Moena pissèda a la vida de “ciacia al endizie” e adatèda a la età di partezipanc, anter i 8 e i 13 egn.
Na lingia de autra ativitèdes se à enterzà con cheles prinzipèles. Va inant la bela colaborazion co la coprativa sozièla Inout, che vel meter al luster i talenc e la idees di joegn del teritorie, con tel cef etres doi gregn obietives: esser sostegniboi da n pont de veduda ambientèl e la valorisazion del lengaz e de la cultura ladina. Gropes de bec del post anter i 6 e i 10 egn à tout pèrt a la vijites vidèdes de 3 sezions del Museo: L Malghier – La Caseificazione, L Stont – Il Casino di Bersaglio e L Segat – La Silvicoltura, jan do l percors de cognoscenza de sia cultura. I tousc più gregn à partezipà a na bela raida co la rodes do l vièl de la rodes de Fascia, cognoscian enveze la sezions de L Stont – Casino di Bersaglio ta Ciampedel e de L Segat – La Silvicoltura aló da la sia de Poza. I percorsc i è stac porté dant per ladin e i à tout ite 190 anter bec e bezes dessema a sie 23 compagnadores.
Via per l istà passà l é stat portà dant ence laboratories e colaborazions con etres enc e coi compagnadores de mesa mont, vijites vidèdes desvalives a gropes de ghesć taliegn e da foradecà. L laboratorie “Toldi Lab” l é l ejit de la colaborazion con Kreides Studiolo de Katiuscia Rasom e Ecosisters de Juan con Tatiana Tulini. Tras momenc de teater e de modelament de la creida, bec anter i 6 e i 10 egn a podù cognoscer i Toldi, personajes gustegoi e enjignegoi che vif ti bosć de Fascia, e ge dèr forma a sie Toldo duran creida del post.
L conzert del cor bulgar de eles Kitka à empienì de oujes gaertes e pienes la Sala Grana del Istitut Ladin ai 14 de messèl, n event che fajea pèrt de la “Rassegna internazionale di musiche popolari” endrezèda dal Mets de Sèn Micel. La vijites vidèdes per i gropes de jent de età e de la Lega del Filo d’Oro à soscedà emozion e enteres. I Servijes Educatives del Museo à endrezà e portà dant per la pruma outa na vijita vidèda che tol ite desvaliva sorts de sensc. Estra che la vista e l udit l é stat durà ence la snèsa e l tast, per ge dèr l met a persones che no veit e no sent beleche più nia de entener che che les à dintornvia. “Inclujion vel dir soraldut se sentir azeté e touc ite te na sozietà, a na vida da poder goder del dut di deric e de la possiboltèdes che chesta sozietà sporc”.
La mostra “Franz Dantone. Fotograf de la Dolomites” é stata a la leta di ghesć te “Sala Heilmann” del Museo dai 7 de jugn enscin ai 19 de aost. Sie retrac l é stat i prumes a raprejentèr la beleza sublima del paesaje dolomitich, portan pro a la definizion del imaginarie coletif, determinant acioche la Dolomites vegne scrites ite te la lingia del Patrimonie Mondièl.
De autra informazions sun:
https://www.istladin.net/it/
