Dar Rat von Djungen vo Eusalp iz gemacht vo 28 toalnemmar (viare vor aniaglaz alpinar Lånt) un bartn stian au vor a djar un mang khemmen vornaügart vor an åndarz.
A plattform ubar di grentzan zo geba vèrt in djungen
Dar Rat von djungen lekk au a plattform zoa zo macha nemmen toal in djungen aftaz sèll boda auzmachan di organe vo Eusalp un sichart ke soine idee un daz sèll bosa vürleng khemm gehaltet guat. Di toalnemmar lengse untar vürzovüara politike un prodjèkte vor in alpinar raum vor di sèlln khempf boda håm da grözarste aile. Da mang vorleng konkrètege arbatn, prodjekte un initziatìvan, vorleng idee in politike von State von redjongen vo Eusalp un machan vorstìan in konkrèt bazta mage khemmen getånt in soine redjongen. Di djungen organizarnse un lirnen zo nemma toal in demokrategen protzessan haltante kunt von linguistìk un kulturàln diferentzan. Eusalp sèlbart lirnt von djungen un nimp å naüge idee vo berda bart lem in di djar boda khemmen afte Alpm.
Dar Rat vinntze viar odar vünf vert vor aniaglan mandàtt un mittarbatet auz pa djar nützante di stuméntn von web vennantese in tematesche khnöpf vürzovüara konkrètege sachandarn. Di djungen augelekk arbatn vor a mobilitét boma mage auhaltn, da arbatn ume åndre initziatìvan gemacht vo djunge, un süachan zo vorstiana baz ma mage tüan vor di alpinar redjongen auz ar a bege in di djar boda khemmen un machan khennen in kulturàl schatz von Alpm.
Kandidatùrn sin atz 31 von madjo 2025
Di djungen boda soin interesàrt håm zait sin atz 31 von madjo zo kandidarase durch in portàl https://alpine-region.eu/alpine-youth/get-involved . Dar Rat von djungen hatt ’z zil zo übarlega bia di Alpm soin åndarst vo redjong in redjong un vor daz sèll bartma zornìrn haltante kunt vo ditza, zoa azta di djungen khemmen vo alln di simm Lentar vo Eusalp, soinz saiz puam, saiz diarnen un vo mearare esperientzan in di organizaziongen. Di State un di redjongen Eusalp bartn zaln di viazan zo giana afte trèff boda bartn nemmen toal di djungen von Rat un bartnen nåstian zo khöda bia un baz.
Dar Rat von djungen iz augehaltet von prodjèkt Alpinar Interedjonàl Raum "Support Eusalp", dar hauppartnen vo disan prodjèkt iz di Redjong Proventz-Alpm-Côte d’Azur. Vor disan prodjèkt, di Redjong Bourgogne-Franche-Comté iz vorantbortlich vor allz bazta ågeat in djungen. Darzuar, vorz djar 2025, di mitt-vorsitzarung Österraich/ Liechtenstein vo Eusalp gitt an groazan vèrt dar arbat gemacht innzovånga di djungen.
Zo bizzasan mearar:
Websait von Rat von Djungen vo Eusalp: https://alpine-region.eu/alpine-youth
Informatziongen übar Eusalp: https://alpine-region.eu/
Da gekhluppet: dar plakatt
Übarsetzt von Schaltarle vor di zung von Toalkamou vodar Zimbar Hoachebene
