Dal 1972 inant la Provinzia autonoma de Trent fèsc pèrt de Arge Alp, Comunità de lurier de la Regions Alpines, che à l zil de contribuir a fèr fora i problemes che à ence la autres regions de la Èlpes te n raport de colaborazion. Fèsc pèrt de Arge Alp i Länder Vorarlberg, Tirol e Salzburg (Austria); l Stat de la Baviera (Germania); la Provinzies autonomes de Busan e de Trent e la Region Lombardia (Tèlia); i Ciantons di Grijons, Son Gagl e Tessìn (Svizra).
Descheche vegn pervedù dal Statut de ls Comunità, i membres de Arge Alp se passa la presidenza ogne an, col ge jir do al orden del alfabet.
Co la deliberazion aproèda ai 22 de november la Jonta, estra che stabilir l argoment de la presidenza trentina, l à enciarià l Servije Mendranzes linguistiches e relazions esternes de se cruzièr di adempimenc de endrez, aministratives e di conc de chest an; l Servije medemo se cruziarà, belapontin, de programèr, endrezèr e gestir la scontrèdes del Ofize de presidenza, de la Conferenza di capi de govern, del Comitat diretif, del Grop relazions publiches, di Gropes de projet, del Premie Arge Alp 2025 e de autra scomenzadives istituzionèles che vegnarà metù a jir enscin a de otober del 2025.
Per chel che vèrda i aspec de informazion e comunicazion, l provediment encèria l responsabol del Ofize Stampa de la Provinzia de se cruzièr del Pian de comunicazion del an de presidenza, tras l coordenament de la ativitèdes del Grop relazions publiches de Arge Alp.
Traduzion di Servijes Linguistics e Culturèi del Comun general de Fascia
