Traduzione in ladino

“Pedies”: vegn fora la puntata #493 del program ladin per la televijion

[Ladino] Ence chesta setemèna l é a la leta l nef apuntament de “Pedies”, rotocalch ladin de informazion, ruà a la puntata n. 493.
I argomenc de chesta setemèna. La edizion n. 24 de la Val di Fassa Running. Do n an de paussa la garejèda a tapes che la tol ite duta la Val la é stata portèda dant da nef con na foja neva, sot l endrez de la Sozietà Gregn Evenc Fascia. Aon rejonà en cont de chest con Cristoforo Debertol, che l ne à contà mingol de la neves metudes a jir e che l à rengrazià e recordà i comitac da dant che acà 24 egn i é ponte via con chesta scomenzadiva.
Ai 27 de jugn te la sala Heilmann del Museo Ladin de Fascia, la Coprativa sozièla INOUT e l Istitut Cultural Ladin “Majon di Fascegn” i à portà dant L Cucarel, l prum concors per projec cinematografics per ladin che l se met dant de sostegnir la produzion de curc filmac apontin per l lengaz de mendranza te la variantes ladines del Sela.
L é ruà endò te Fascia la garejèdes de enduro. Dai 27 ai 29 de jugn Pas Pordoi, Jouf de Sela e Ciampac l é stat i lesc da marevea coi 7 percorsc de garejèda. 60 chilometres en dut e più che 3000 metres de deslivel, na fin de setemèna belebon da struscies donca, tant per i 526 partezipanc, rué adalerch da 33 nazions, che per l comitat de endrez del Fassa Bike District. N mond chel de la roda che te Fascia cresc a do a do, de fat l é jà tel calandèr la garejèdes del an che vegn e dapodò i comitac de endrez speta neves en cont di Mondièi de roda da mont del 2031.
L Coro Nosc, co la colaborazion de La Mizacoles de Ciampedel, l à metù a jir l event “Dit, scrit e ciantà”. L Coro Nosc à festejà sie prumes 10 egn de atività, e co l’ocajion se à podù scutèr per la pruma outa la cianties “orazion da mont” e “bon star” scrites dal maester del cor Peter Decrestina e armonisèdes dal maester Ilario Defrancesco. Endèna la sera l é stat portà dant, apede la cianties, ence cater scric neves de Peter e la aventures del cor de chest ultim an. Ma l Coro Nosc l à pissà ence a etres evenc per sie cedean che i vegnarà porté dant via per chest uton.