Manà fora su Trentino Tv l program l vegn endrezà dal Comun General de Fascia

“Pedies”: vegn fora la puntata #481 del program ladin per la televijion

Ence chesta setemèna l é a la leta l nef apuntament de “Pedies”, rotocalch ladin de informazion, ruà a la puntata nr. 481.
I argomenc de chesta setemèna l é:
L campion de schi Stefano Gross l à serà su sia cariera agonistica. Do 20 egn passé co la squadra nazionèla, 165 garejèdes te copa del mond olache per 12 outes l è ruà sul podie; do 9 podies de Copa Europa e 5 medaes de or ai campionac taliegn, Gross l lascia su co la garejèdes de copa del mond de schi. La redazion de Pedies la ge à dedicà na bela intervista olache l conta de sia esperienzes sportives, di bie suzesc e ence de vèlch delujion e olache l saluta de cher duc i tifosi che i ge è stac apede te chisc egn.
L’Azienda per l Turism de Fascia, ai 3 de oril passà, l’à metù a jir na scontrèda publica per portèr dant l projet GSTC: Global sustainable Tourism Council. Se trata de n recognosciment internazionèl emportant olache vegn pervedù de arjonjer cerc livie de standard de sostegnibilità en relazion al contest sozio-economich, culturèl, ambientèl e de governance. L’APT l’à dezidù de meter a jir chest percors col tor ite raprejentanc istituzionèi, imprenditores e operadores locai per aer n confront partezipà.
Na rezeta da d’aisciuda per la domenia de Pèsca. L chef Nicola Pellegrin del Hotel Al Lago da Soraga l ne met dant na rezeta scempia e gustégola per n piat fat con prodoc locai desche: polenta, formai de mèlga, speck e spèrjes. No menciarà vèlch curiosità per fèr amò più bona chesta speisa.