Manà fora su Trentino Tv l program l vegn endrezà dal Comun General de Fascia

“Pedies”: per en sabeda ai 9 de aost vegn fora la puntata #498 del program ladin per la televijion

[Ladino] Ence chesta setemèna l é a la leta l nef apuntament de “Pedies”, rotocalch ladin de informazion, ruà a la puntata n. 498. I argomenc de chesta setemèna.
I Turchi a Moena, na conferenza portèda dant te Palaz de la Magnifica Comunità de Fiem da Fabio Chiocchetti del Goti olache se à rejonà del cianton de Turchia de Moena, de chest toponim foradeanter che encuriosesc e che à fat nascer stories e lejendes, defat de oril de chest an l é vegnù fora ence la miniserie turco-unghereisa “Il Turco”.
Brundibár: l spetacol portà sun paladina del teater de Navalge da la scola interregionèla per l teater e l ciantèr Le Muse e le Dolomiti. Chesta opera lirica con bec e tosec l é na contia n muie da sentiment, che porta dant ence n argoment fort. L é stat na ocajion de comemorazion a 80 egn da la fin de la 2a vèra mondièla.
Michil Costa a Moena per rejonèr de turism, de la Dolomites, del trafich, de overtourism e de la comunanza ladina. Na conferenza enteressanta per endrez de “Moena-Incontri” olache l autor del liber FuTurismo l à portà dant ai prejenc sia idees en cont di limic, di problemes e de la prospetives de la comunanza ladina de la Dolomites che anchecondì la vegn condizionèda da n’economia turistica zenza confins, che la risia de straoujer sia ejistenza e so ambient.
Per la rubrica “Piates: Chel liber sun scancia” Maria Piccolin, che la è stata responsabola per n muie de egn de la biblioteca de Moena, la ne porta dant l liber “Addio Tirolo Addio” de Giorgio Bassi, che rejona de coche la jent de Vattaro l’à cognù se n jir profuga en Moravia endèna la Gran Vera.