Traduzione in ladino

“Pedies”: per en sabeda ai 8 de mèrz vegn fora la puntata #476 del program ladin per la televijion

[Ladino] Ence chesta setemèna l é a la leta l nef apuntament de “Pedies”, rotocalch ladin de informazion, ruà a la puntata 476. I argomenc de chesta setemèna l é: la Dì internazionèla de la malaties rères: na ocajion de sensibilisazion e speranza.
En ocajion de la Dì internazionèla de la malaties rères, stata ai 28 de firé, i Servijes sozio-assistenzièi del Comun General de Fascia i à volù endrezèr n domesdì de sensibilisazion dintornvia l argoment coi tousc de la clasc secondes de la scoles mesènes de Ciampedel. Tras testimonianzes en pruma persona se à volù sparpagnèr consapevoleza anter chisc joegn, per soscedèr empatia e per ge ensegnèr l’emportanza de l’inclujion e del respet. L é stat sotrissà ence l’emportanza de la enrescida scientifica su la malaties rères e apontin per la sostegnir ge é stat consegnà al Dipartiment de Biologia Cellulare, Computazionale e Integrata de Trent la donazions binèdes su per la diagnosa de la malaties rères; l Carnascèr de Ciampedel l é stat viventà da mèscres tradizionèles dassen curiouses de gra al Istitut cultural ladin Majon di Fascegn. Dessema co la Diretora del Istitut Cultural Ladin Sabrina Rasom capiron l segnificat simbolich de Jan Deluvio e de la Catertempora; ai 3 de mèrz, a Sèn Jan l é stat endrezà da l’Autorità per la Mendranzes linguistiches de la Provinzia de Trent na scontrèda de confront anter istituzions. Al apuntament l é stat envià a tor pèrt i raprejentanc de la istituzions de Fascia dessema con raprejentanc provinzièi e regionèi per fèr fora argomenc e aspec de enteres per l stravardament de la Comunanza Ladina. L é stat rejonà de politiches abitatives, de ejames de zertament del lengaz e de la cultura ladina e de toponomastica; la Crousc Checena de Fascia e Fiem la met endò a jir i corsc de formazion per neves socoridores.
Ai 13 de mèrz pearà via l cors de formazion che l jirà inant enscin ai 18 de oril. La formazion per neves volontères la vegn metuda a jir te la senta de la Crousc Checena de Ciavaleis, ma per i volontères de Fascia sarà l met de tor pèrt online aló da la sentes de Vich e de Moena. Per se enscinuèr ai corsc se pel tor su l qr code che se troa sui placac che l é fora per la val opuramenter su la piata Facebook de la Sociazion.