Manà fora su Trentino Tv l program l vegn endrezà dal Comun General de Fascia

“Pedies”: per en sabeda ai 27 de setember vegn fora la puntata #505 del program ladin per la televijion

[Ladino] Ence chesta setemèna l é a la leta l nef apuntament de “Pedies”, rotocalch ladin de informazion, ruà a la puntata n. 505.
I argomenc che porton dant te Pedies de chesta setemèna l é:
L Dì dla Cultura Ladina stat en domenia passèda vin Badia olache l é stat fat na conferenza de carater scientifich e la consegna de la pruma Onoranza al Merit Ladin. Dantmesdì l é stat portà dant referac scientifics entorn la tematica de la conties ladines co la consegna del dossier per l recognosciment desche patrimonie imaterièl de l’umanità. Domesdì l era laboratories desvalives e dò l moment segnificatif de la consegna de la pruma onoranza al merit ladin data al prof. Lois Craffonara per egn alalongia diretor del Istitut Cultural Micurà de Rü. L se trata de n studious che l se à dat ju trop con enrescides e publicazions de linguistica, èrt, storia e letradura che les à dat nonzech a la mendranza ladina ence foravia.
La festa fata a Soraga per la desmonteèda con bronsins e gherlandes da fiores per la vaces ben fornides per l’ocajion. Na festa metuda a jir dai volontadives del paisc con musica, gropes de folclor e prodoc de artejanat e da magnar. La scomenzadiva la se lea ence al Festival del Spretz Tzaorì che la vegn metuda a jir semper de setember anter Soraga e Moena. Ence per chesta rejon la Mèlga de Fascia l à portà dant na desmostrazion de coche vegn fat l formai Spretz Tzaorì DOP n prodot ezelent n muie cognosciù che l caraterisea nosc raion.
L Chino Marmolada de Cianacei l à endò avert i ujes co na neva aria joena. La strutura defat la é stata touta te man da la sociazion culturèla Kino, con a cef l President Lorenzo Dezulian. L’intenzion l é chela de meter a jir desvaliva scomenzadives per i joegn de Fascia. Lorenzo te sia intervista l ne met en consaputa de la desvaliva scomenzadives, de la idees e de la proponetes de chesta neva gestion.