Manà fora su Trentino Tv l program l vegn endrezà dal Comun General de Fascia

“Pedies”: per en sabeda ai 26 de messèl vegn fora la puntata #496 del program ladin per la televijion

[Ladino] Ence chesta setemèna l é a la leta l nef apuntament de “Pedies”, rotocalch ladin de informazion, ruà a la puntata n. 496.
I argomenc de chesta setemèna. L é stat chiamà ite l prum Consei General del Comun General de Fascia do da la litazions dai 4 de mé. Te chesta pruma sentèda, l é stat lità Tea dezulian desche Presidenta del Consei e Cristina Donei e Simone Congiu desche vize. L Procurador l à ence portà dant la linies de program per la legislatura de la neva aministrazion sun cheles che la mendranza l’à palesà sie dubies.
Te Fascia l é nasciù n nef grop de musica: “I Maestres de schi”. Cinch joegn musizisć i à metù su na rock tribute band, che vel tegnir su e sparpagnèr anter la neva generazions la musega de Lucio Chiocchetti da Moena cognosciù desche L Chum. La pruma ejibizion de chest grop la é stata en domenia ai 20 de messèl sun Valbona, sun Lujia, tel cheder del event del Val di Fassa Panorama Music. Ence Pedies – Tv Ladina la era aló per l’ocajion.
Tinultima, te chesta puntata vegnarà portà dant n nef apuntament de la rubrica “Lesc: cuchèr te ogne piz e cianton”.
Chest’outa sion jic dessema con Christian Bernard fin sun Pian, sora Ciampedel, per cognoscer e se fèr contèr n mingol de storia e de curiositèdes sun chesta picola Vila. N lech encantesimà olache somea che l temp se abie fermà. Chiò la cèses, i tobié e i pré ben rencuré i fèsc amò respirèr l’aria da zacan, dalonc dal trafich e dal gran busiament del turism che te chest temp d’istà l straouc la vita normala de paisc.