Traduzione in ladino

“Pedies”: per en sabeda ai 24 de mé vegn fora la puntata #487 del program ladin per la televijion

[Ladino] Ence chesta setemèna l é a la leta l nef apuntament de “Pedies”, rotocalch ladin de informazion, ruà a la puntata n. 487. I argomenc de chesta setemèna. L Fascia Balon à endrezà na festa con duc chi che à a cher la sociazion, n moment per esser na comunanza duc chenc leé dal jech al balon. Te chesta ocajion l President onorarie Walter Ghetta, che con gran gaissa l é stat a cef de la sociazion 35 egn alalongia, l ge à passà la bala al nef President Pier Paolo Trottner.
L invern che vegn, dai 6 ai 22 de firé l é la Olimpiades Milan Cortina 2026, con garejèdes ence te Fiem. A Moena l é stat na scontrèda per tor dant duta la costions che revèrda la segureza de chest aveniment mondièl col Comitat Provinzièl per l Orden e la Segureza, con ite l Comissèr del Goern Giuseppe Petronzi, la Finanza, la forzes del orden, la Fondazion Milano-Cortina e ence i Ombolc de Moena, Pardac e Tieser.
Te la rubrica “Lesc: cuchèr te ogne piz e cianton” sion jic a Ciampedel, paisc doventà da la metà del 1500 l più emportant de la Val de sora, ajache l era doventà curazia, e sia gejia la tolea ite dut l raion da Fontanac enfin ta Penìa. Te chesta puntata cognoscion l Picol Cartier de Ciampedel, n cianton rich de storia e de fac curiosc conté da Christian Bernard e Raffaele Rizzi.