Traduzione in ladino

“Pedies”: per en sabeda ai 22 de mèrz vegn fora la puntata #478 del program ladin per la televijion

[Ladino] Ence chesta setemèna l é a la leta l nef apuntament de “Pedies”, rotocalch ladin de informazion, ruà a la puntata nr. 478.
I argomenc de chesta setemèna l é:
“Genius – Leonardo da Vinci anter Èrt e Scienza”: i studenc de la clasc terzes di licees scientifich e artistich de la Scola Ladina de Fascia i à endrezà na mostra dedichèda a Leonardo da Vinci, con duc sie enteresc e sia inovazions. Leonardo l é stat scienziat, artist e enjegner, ma soraldut na persona n muie curiousa e da anteveder. I vijitadores i podarà veder 13 modelins de la machines enventèdes da Leonardo, dates adimprest dal Ecomuseo della Roggia di Vigevano. Se pel jir a veder chesta mostra, tras prenotazion, aló dal Liceo artistich de Sèn Jan enfin ai 3 de oril.
N atlet spezièl per i Special Olympics Games. Ugo Valentini da Ciampestrin campion de brea l à vent 3 medaes de bron ai Jeghes Mondièi da d’Invern de Torin. Chest an defat i “SPECIAL OLYMPICS WINTER GAMES” i é stac belimpont a Torin, dai 8 ai 15 de mèrz. Chiuò à tout pèrt passa 1500 atlec da 100 nazions de dut l mond. Anter i atlec taliegn, l era ence Ugo Valentini da Ciampestrin che l va co la brea e l é stat bon de se venjer 3 medaes de bron. Ugo l ne conta de coche l se à enjignà per chest apuntament e de sia pascion per desvalives sport.
“NOSC TEMP” l é l titol de na regoeta de retrac metui ensema da n grop de joegn per dèr lèrga a imprescions e emozions che soscedea l’èrt de la fotografia. Chest lurier l é l frut de na scomenzadiva de la Sociazion Antermoa, portèda inant col coordenament de Davide Baldrati e ades, do passa un an de lurier, i é rué a piz con chest regoi tant rich sibie de retrac che de contegnui.
La prejentazion la é stata en sabeda ai 15 de mèrz a Cianacei. Coche se pel scutèr da la intervistes de chisc joegn, l é stat na esperienza che ge à permetù de madurèr n percors formatif e apede a la tecnica de la totografia, la ge à dat lèrga a na pascion da poder svelupèr, miorèr e portèr inant.
Sellaronda Skimarathon: emozions e adrenalina sui jouves de la Dolomites. I é stac 1.100 chest an i atlec, da passa 20 nazions, che i se à endesfidà te chesta garejèda, con scomenz e travert a Selva. Chest’outa i chilometres da fèr i era 37, enveze che 42, con 2400 metres de deslivel positif. I atlec i é jic con gran sfadièdes su per i jouves de Frea, Ciaulonch, Pordoi e Sela. L é stat na garejèda n muie ria a cajon de la condizions meteo con neif e freit. Aboncont, la Sellaronda Skimarathon la se conferma desche una de la competizions de schi da mont de gran nonzech e vigni an la bina adalèrch atlec e pascioné da dut l mond.