Manà fora su Trentino Tv l program l vegn endrezà dal Comun General de Fascia

“Pedies”: per en sabeda ai 20 de setember vegn fora la puntata #504 del program ladin per la televijion

[Ladino] Ence chesta setemèna l é a la leta l nef apuntament de “Pedies”, rotocalch ladin de informazion, ruà a la puntata n. 504. I argomenc che porton dant te Pedies de chesta setemèna l é:
En domenia ai 14 de setember se à binà a Ortijei per la pruma outa duta 7 la compagnies di scizeres de la valèdes ladines. N moment de fradaa olache l é stat uzà fora i valores de l’identità, del lengaz e de la cultura ladina, che i vegn ca da sia storia, che veit i ladins del Sela leé adum te sia storia madurèda tel raion del Tirol storich.
L comun de Sèn Jan à endrezà na lingia de scontrèdes con dotores e esperc per rejonèr del bonstèr de le eles. Fora per l meis de setember e fin ai 20 de otober vegnarà donca portà dant desvalives argomenc: la prevenzion, sanità reprodutiva, maternità, malaties possibioles, perimenopausa e menopausa.
A la gran festa da d’istà, stata la fin de setemèna passèda, l Istitut Cultural Ladin Majon di Fascegn per fèr festa per sie 50 egn l à envià a tor pèrt a la defilèda ence le autres mendranzes de la Tèlia. Se à abù l met de veder guanc e bandieres e de scutèr lengac che, enceben che desvalives, é pèrt de na rei e de na fradaa che laora per l medemo obietif: sie stravardament.
I Teufel da Soraga i à endrezà sia pruma mostra de faceres e guanc da Krampus. Apede a ic ence i gropes da Poza, Bronzol e Aldin con faceres con veièdes e ghignes aricegoles, guanc, cedenes, bronsins, paicenes e efec spezièi e da spaent, che sessaben fèsc gran poura a bec e tosec.