Traduzione in ladino

“Pedies”: per en sabeda ai 17 de mé vegn fora la puntata #486 del program ladin per la televijion

Ence chesta setemèna l é a la leta l nef apuntament de “Pedies”, rotocalch ladin de informazion, ruà a la puntata n. 486.
I argomenc de chesta setemèna. Cedean per i 45 egn di Schuhplattler de Ciampedel che i à fat gran festa en ocajion de la sègra del paisc. L era belavisa l 1980 canche de gra a la convinzion de don Tito l è stat metù su chest Grop che l è doventà n pont de referiment per duta la comunanza. Anchecondì l dombra 30 componenc, l tol ite ence eles e n grop de picoi bec. Sion jic a se fèr contèr zeche de più dal President Samuel Lazzer e da Stefano Lazzer che l era te anter i prumes fondadores.
A Pardac chisc dis pasé l é stat portà dant na scomenzadiva a chela che à tout pèrt la scoles profescionèles e la firmes da artejan de Fascia e Fiem. Te chesta ocajion ge é stat portà dant soraldut ai joegn i lurieres da artejan che l é te noscia valèdes ence col obietif de ensegnèr l lurier e ge fèr entener l’emportanza de na profescion col recordèr che n mestier l pel arsegurèr n bon vadagn e dèr de gran sodisfazions.
Chest an l’ACAT de Fascia la compesc si 40 egn. L pionier che l à metù su chesta sociazion l é stat Sergio Valle che te na intervista l ne conta de sia esperienza. Anchecondì chesta organisazion, con a cef marino Pederiva, no la se cruzia demò del problem del alcol ma la é a la leta per didèr duc chi che à problemes de ogne sort.
La Union di Ladins de Fascia, tel chèder de la scomenzadives per l’Aisciuda Ladina de chest an, l’à endrezà na raida vin Gherdena per cognoscer na pèrt de noscia bela Ladinia. Col endrez del President Fernando Brunel l é stat fat na vijita al Museum de Gherdeina, a la gejia de Sacun e ai mèjes de Peza e Mëune. Na di anter storia, cultura e toponimes ladins che l é ence l argoment de l’Aisciuda Ladina 2025.