Manà fora su Trentino Tv l program l vegn endrezà dal Comun General de Fascia

“Pedies”: per en sabeda ai 13 de setember vegn fora la puntata #503 del program ladin per la televijion

[Ladino] Ence chesta setemèna l é a la leta l nef apuntament de “Pedies”, rotocalch ladin de informazion, ruà a la puntata n. 503.
I argomenc che porton dant te Pedies de chesta setemèna l é:
L scomenz del nef an de scola, peà via enstadì. N dat che fèsc cruzièr l é segur chel del smendrament di scolees enscinué te la Scola Ladina de Fascia. Del 2019 i era 1250 ades enveze i é en dut 1038. N trend chest che no l vèl demò per la Scola Ladina de Fascia ma per duc i paijes ozidentèi. Aon domanà donca al Sorastant de la Scola Ladina Federico Corradini che che comporta chest smendrament e coche l é peà via chest an de scola.
Fascia Balon. Aon intervistà l president Pier Paolo Trottner che l ne à contà de coche la pruma squadra del Fascia Balon la se à endrezà per chest nef campionat tanche pontà via. Rejonaron ence de l’ativitèdes che la sociazion met a jir per i più joegn, dai 6 egn en su.
Polins de Sèn Jan. Sion jic do a sentir coche i se à endrezà i Polins de Sèn Jan do che l Comun l se à tout fora da la Convenzion de Val. Aon rejonà del gran tegnir che i cogn controlèr e ence del problem di camper che da n trat en ca te Val i à scomenzà a esser dassen massa.
Tel ultim report rejonaron de Marcialonga Running. Più che 1500 i é stac i atlec al via de la 23eisema Marcialonga Running Coop. Da Moena i se à dat endesfida fora per Fiem, chi co la garejèda curta de 21 chilometres, con travert a Masi e chi coi 26 chilometres per ruèr a Ciavaleis. Davide Stoffie, diretor Marcialonga, l se à dit content de la garejèdes de chest an, semper con n bon numer de enscinué e con n endrez che à semper garatà. L apuntament che vegn l é per de jené, per la 53 eisema Marcialonga.