Traduzione in ladino

“Pedies”: per en sabeda 1 de mèrz vegn fora la puntata #475 del program ladin per la televijion

[Ladino] Ence chesta setemèna l é a la leta l nef apuntament de “Pedies”, rotocalch ladin de informazion, ruà a la puntata 475. I argomenc de chesta setemèna l é: “Cognoscion l’autonomia”: con chest titol l Consei provinzièl de Trent l vel uzèr fora sul teritorie, co n’atenzion outa soraldut ai joegn, l valor de chesta particolarità che caraterisea nosc raion. L è per chest che en jebia ai 20 de firé, aló da la Scola Ladina de Fascia l è stat fat na scontrèda dedichèda a chesta tematica olache apede a desvalives raprejentanc politics, a professores universitères, al Procurador del Comun General de Fascia, à tout pèrt ence i studenc de la Scola Ladina de Fascia e de la scola auta de Rorei; en ocajion de la Dì internazionèla del lengaz de la mère 2025, che la è stata ai 21 de firé, l Ofize Linguistich del Comun General de Fascia l à metù a jir n event n muie curious te Piaz del comun de Poza. Col didament de Marco Mattia e de si aparac tecnics, l é stat portà dant al publich na performance musicala fata coi sons de desvaliva paroles ladines. L ladin donca, con si sons forc e sibilanc l à dat l met de creèr zeche da bel e deldut fora de anter; la Magnifica Comunità de Fiem la è stata protagonista de na convenzion col Comun General de Fascia e la Comunità comprenjorièla del Überetsch-Unterland outa a valorisèr la patrimonie linguistich di trei lengac che vegn rejonà sun so teritorie: l ladin, l todesch e l talian. L fin l é chel de meter a jir projec de valorisazion e de enrescida sui lengac locai, e ence sui dialec de Fiem, a na maniera de ruèr ti egn a meter enesema, ence col didament de esperc, na regoeta de material linguistich e de ge l proferir a la jent ence très dizionères online; per la neva rubrica “Piates: chel liber sun scancìa” dedichèda belimpont a la prejentazion de tesć, Alberta Rossi de la Majon di Fascegn la ne moscia vèlch liber che l trata del carnascèr. Più avisa la ne met dant aspec tradizionèi e inovatives che revèrda belimpont la facera de legn che la raprejenta sessaben un di elemenc più emportanc de la tradizion del carnascèr fascian e che amò anchecondì, ence te anter i joegn, la vegn vivuda e portèda con gran gaissa.