Manà fora su Trentino Tv l program l vegn endrezà dal Comun General de Fascia

“Pedies”: en sabeda ai 29 de november vegn fora la puntata #514 del program ladin per la televijion

[Ladino] Ence chesta setemèna l é a la leta l nef apuntament de “Pedies”, rotocalch ladin de informazion, ruà a la puntata n. 514. I argomenc che vegn portà dant te la puntata de chesta setemèna l é:
Ai 25 de november, per la Dì internazionèla per descancelèr la violenza contra la eles la Scola ladina de Fascia en colaborazion col Comun General de Fascia, l à endrezà “No una de più” na sera de sensibilisazion en cont a la violenza de jender. Fora per la setemèna passèdes i studenc di licees con sie ensegnanc i à lurà fora l argoment tras enrescides e sondajes. Endèna la sera i à portà dant stories de violenzes e i dac biné su; de grà ai esperc Franca Giovanelli, Responsabola del portel de scout de la sociazion La Voce delle Donne, i avocac Andy Rossi e Alberto Scerbo, e la soziologa Valentina Molin,i à prejentà n chèder prezis sul argoment en cont a noscia valèdes.
“Talis Mater” l film del regist Marco Rossitti, produzion de la Majon di Fascegn, l é stat portà dant per la pruma outa te Fascia. Na testimonianza de gran emportanza che rejona de Liz e Sunta, mère e fia, che les à scrit e che les seghita amò a scriver la storia del Vera; chela picola vila sora Penìa, la più auta de dut l Trentin. N viac tel cher de la ladinità anter passà e prejent, per se far n pensier su tant che la memoria individuèla e coletiva la seghita a ge dèr forma al paesaje uman de la Dolomites.
Te la rubrica “Svampol ciatarul: jent che fèsc jerveèr sie cunst” Manuel Riz autor e desegnador se porta dant e rejona de sie nef liber “Il pendio bianco” olache tras i comics l conta de la storia del schi. Na publicazion con contegnui neves e no cognosciui che la vegnarà portada dant a duta la comunanza en lunesc 1m de dezember domesdì te museo ladin de Fascia.