Manà fora su Trentino Tv l program l vegn endrezà dal Comun General de Fascia

“Pedies”: en sabeda ai 18 de otober vegn fora la puntata #508 del program ladin per la televijion

[Ladino] Ence chesta setemèna l é a la leta l nef apuntament de “Pedies”, rotocalch ladin de informazion, ruà a la puntata n. 508. I argomenc che vegn portà dant te la puntata de chesta setemèna l é:
En domenia ai 12 de otober l é stat fat festa per i 500 egn de la gejia da Ciampedel, la pruma gejia fata su do da la Pieif de Sèn Jan, per ge dèr l met a la jent de la val de sora de aer na gejia più apede.
L servije, apede, l met dant ence n aprofondiment storich cutlurèl coi enrescidores de storia locala Raffaele Rizzi, Gabriele Valentini e Christian Bernard.
L Lions club de Fascia e Fiem à endrezà a Sèn Jan na scontrèda dal titol “Joegn e situazions scherpentes” na sera de informazion per na comunanza che chier responetes e che vel didèr. N moment de confront, na meisa torona anter esperc, istituzions e la popolazion per ge dèr ousc a n dejèje da spes sconet.
L é scomenzà enstadì la 5a edizion de Antropolad, l cors de auta formazion che se ouc soraldut ai dozenc de la Scola Ladina de Fascia per na maor cognoscenza del raion ladin anter antropologia e lengaz, apede ence soziolinguistica, storia, letradura e didatica; te vigni edizion l é ence corsc con neves aprofondimenc.