Manà fora su Trentino Tv l program l vegn endrezà dal Comun General de Fascia

“Pedies”: en sabeda ai 17 de jené vegn fora la puntata #521 del program ladin per la televijion

[Ladino] Ence chesta setemèna l é a la leta l nef apuntament de “Pedies”, rotocalch ladin de informazion, ruà a la puntata n. 521. I argomenc che vegn portà dant te la puntata de chesta setemèna l é:
I ambulatories de traumatologia e Ortopedia de Sèn Jan i é endò averc. L’Azienda Sanitèra Universitèra del Trentin l’à troà l personal che l é debesegn e con en jebia ai 15 de jené chest servije de gran emportanza per duta la val l é endò en funzion. I ambulatories i sarà averc duc i dis da les 10 dadoman a les 7 da sera enfin a la fin de la sajon.
Gran festa a Sèn Jan per i 40 egn de l’università de la terza età e del temp ledech. N travert emportant che testimoniea l amor per la cultura, la condivijion e l esser amisc che tegn ensema chesta scomenzadiva metuda su del 1986 con Rita Tentori Detomas. Con desvaliva intervistes vegn contà de chel che vegn fat, di corsc endrezé che i tocia desvalives argomenc che i à a che fèr ence co la storia e la cultura locala, la cura de la persona, la malaties, la medejnes, e ti ultimes tempes ence la ginastica. Na realtà che la deida a tegnir l cef atif e a fèr crescer i raporc anter la jent e la comunanza.
Te la rubrica “Svampol ciatarul: jent che fèsc jerveèr sie cunst” porton dant la terza puntata de Ewald Senoner, n artist de gran braura e sensibilità. Con sia miniatures l ne à encantà, no demò per coche l é stat bon de ge dèr vita a si lurieres, ma ence perché l ne à portà a fèr n viac te la storia a veder coche la era zacan te chesta valèdes. Te chesta terza puntata l ne mosciarà amò de autra curiositèdes desche la veia ferata de Gherdena, la Sia de Penìa e l mèsc olache l é nasciù.