Manà fora su Trentino Tv l program l vegn endrezà dal Comun General de Fascia

“Pedies”: en sabeda ai 15 de november vegn fora la puntata #512 del program ladin per la televijion

[Ladino] Ence chesta setemèna l é a la leta l nef apuntament de “Pedies”, rotocalch ladin de informazion, ruà a la puntata n. 512. I argomenc che vegn portà dant te la puntata de chesta setemèna l é:
Michelangelo Croce e Andrea Carpano, patrons di cajeli de Moena del Agritur el Mas e de Carpanolat, i à prejentà enstadì a Sèn Micel l nef formai “Cruf de Moena”. N moment de confront per rejonèr de tradizion, artejanat e autentizità de n prodot che vegn fat apontin con lat cruf; ma ence per rejonèr de comunicazion e informazion per stravardèr i avantores.
La Union Generèla di Ladins dla Dolomites l à porta dant i Minidiz ladins con argoment l sport, la Olimpiades e Paralimpiades. Chisc picoi dizionères, endrezé da Daria Valentin dal ladin dolomitan al talian, franzous, todesch, ingleis e spagnol, i é stac enjigné tel chèder de n projet più gran per fèr cognoscer, en ocajion de la olimpiades da d’invern, la mendranza ladina a dut l mond.
Te la rubrica “Svampol ciatarul: jent che fèsc jerveèr sie cunst” Cristian Frigo se porta dant. Do aer śirà l mond, soraldut europa del nord e America, Cristian l à metù su “Bolzano SLUSH’D” e l deida a portèr inant projec de Startup, svilupèr idees e soluzions inovatives.